MISSA RAITHAWINAK CU PA PATHIAN, JESUH KHRIH, BUPI, PUMPAK LE VAWLEI HE AA PEHTLAI (2)

(C) MISSA RAITHAWINAK CHUNGAH BUPI HE KAN I PEHTLAI.
(i) Khrihfa vialte nih Missa raithawinak ah hmunkhat ah kan i fonh tikah, Bupi i a u le nau a sinak kha an langh ter. Missa raithawinak thawngin hmunkhat ummi mibu pakhat lawng si lo in a nungmi pum, Khrih pum aa hrawmmi pum ah a kan ser. Hi raithawinak thawngin kannih vialte, pakhat le pakhat zawn i ruahnak, i zohkhenh nak thinlung kha pakhat cio kan cungah a tthanter.
(ii) Missa raithawinak thawngin Bupi chungtel vialte he kan i fonh dih.
Vawlei ah khual a tlawnglio mi Bupi, Thianternak hmun i a um mi, Vancungram a um mi Bupi .. Hi Bupi hna he missa raithawinak thawngin kan i fonh. Pakhat le pakhat harnak kan ton tikah kan i bawm cio hna.
(iii) Missa raithawinak ah kan i telnak thawngin kan nih vialte a hmanmi biakamnak kan tuah. Khrih nih mi vialte kha a dawt hna i mi vialte caah a nunnak a pek hna bantuk in kannih vialte nih midang kha dawt ding ah le mi vialte caah kan nunnak pek ding ah biakamnak kan tuah a si.

(D) Missa raithawinak chungah pumpak cio in kan i pehtlai.
(i) Hi raithawinak thawngin kannih vialte kha Pathian i a thiangmi miphun chungtelnak ah a kan ser. Kannih vialte Pa Pathian le Bawi Jesuh he hmunkhat ah thukngai in i fonh in mah pumpak cio in nun ding timi ruahnak in a kan lak hleiah kan nunnak kha a nganter.
(ii) Khrih Pum le Thi in cawmmi kan si caah Pathian vel in a kan khahter. Cu vel cu zungzal nunnak le hmailei can sunparnak caah hramthawk can in a um cangmi vel a si.

(E) MISSA RAITHAWINAK CHUNGAH VAWLEI HE A PEHTLAI.
(i) Bawi Jesuh nih amah pum kha vawlei caah a pek bantuk in, kannih vialte missa raithawinak thawngin, Khrih a raithawinak chungah luh in Khrih he i fonh in vawlei pumpi caah pekchanhnak kha kan tuah.
(ii) Missa raithawinak chungah mi vialte caah thlacamnak kan tuah lawng si lo in pumpak cio caah siseh, innchungkhar caah siseh, hmunkhat ah a ummi bukhat caah siseh, mi zapi caah siseh nawlnak kha tuah a si.
(iii) Missa raithawinak cu hmel chunhnak in langhter mi raithawinak a si. Sermi vialte an dihlak in thianter le Pathian sinah hmunkhat ah pekchanh kha a si.

Catial tu /- Paceu