Mithiang Peter le Pual

Nihin cu Mithiang Peter le Paul hna i puai ni a si tiin bupi nih a kan tuah piak. Hi puai kan tuah nak thawngin kan mah vialte hna zong nih an nun ning hna le Bawipa nih a thiam hna hnu ah rian a pek mi hna an ttuan ning cang hna hi i zohchunh ding in ruat ti hna u sih.

Mithiang Peter

Jesuh nih cun, “Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si. Cucaah cun nang cu lung tum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo. Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai,” tiah a ti. (Matt 16:17-19)

                Mithiang Peter cu Galilee peng in nga tlai pakhat a rak si. Ngatlai kan ti tikah a rian ttuan nak kan hun ruah tthan a si ah cun ttih a nung ngai mi zong a si. Rili cung ah tilawng in ngatlai pawl an si ning hna cu theih cio a si bangin a nih zong hi zeitik thlichia le tilet ruah lo piin a thawh hnga i ka thih lai ti zong i hngalh lo nun a si caah ttih tuk ding a si. Nifatin a nun kawl hnawl nak ah rian fakpi ttuan in a paw aa cawm mi a si ti zong in ti khawh a si fawn.

                A pawngkam um hawi hna he rian hrang ttuan a si bangin a thin zong a tawi kho men. Khua fakpi ruat tuk lo in rianttuan nak zongah a lung a rang kho mi zong a si kho men lai. Kan Bible cathiang chung kan zoh tik zongah Bawipa zultu hna lak ah an hmai in a um leng mang mi zong a si. Khualrang ngai in Bawipa chim mi hna zong a leh tawn.

                Sihmanhsehlaw, Bawipa nih Peter cu a auh i a min ah “Lungtum” “Peter” timi min a pek. Lungtum pi bangin fawi tein hnih khawh lo mi si dingin Bawipa nih a rak thim. Bupi hruaitu dingah a thim i tuah ser khawhnak nawl zong a rak pek. Fawi tein hnih khawh lo ding le lungtawi lo tein um ding in thim a rak si. Amah rian changtu hna, Bupi hruaitu Pope hna zong hi cu ve bangin an si.

Mithiang Paul

Zeicahtiah Bawipa nih a kan pekmi nawlbia cu: ‘Nannih cu Jentail mi ca i ceunak si awk le Vawlei cung dihlak ca i khamhnak lam si awkah kan chiah hna,’ ti hi a si,” tiah a ti. (Act 13:47)

                Mithiang Paul kong kan zoh tthan a si ah cun, cathiam mi hna le mifim mi hna pawng kam in a rak tthang mi a rak si. Thiam sannak a ngeih bantukin a zumhnak cung zongah ngamh sang ngai in rian a ttuan ngamtu zong a si ve. A hmaan tiah a ruah mi cungah thil a tuah ngamtu a si. Phundang in kan chim a si ah cun, a fim thiam nak cungah “Kei mah” timi lungput zong a rak ngei kho men lai.

                Sihmanhsehlaw, Bawipa nih a thim i a min “Saul” in “Paul” tiah a thlen piak hnu ah cun mithiang Paul nih zeibantuk lungpuar nak hmanh ngeih ti loin Bawipa fial mi rian lawnglawng hi a nunnak ah tuah sernak in a langhter tu a hung si. Cu caah mithiang Paul nih a ti mi cu: “Kei ka caah cun nunnak cu Khrih a si ko”(Phi 1:21) tiah a ti khawh.

                Mithiang Paul cu Bawipa nih a thim i Jentail mi hna sin thawngttha chim dingin fial a si bangin Bupi chung zongah thawngttha chim in rian a ttuan tu "evangelist" hna an um bantukin mithiang Peter bangin zeibantuk tukforhnak hmanh nih hnih khawh lo in zumhnak he bupi a hruaitu hna zong an um.

                Mithiang Peter le Paul hna cu Bawipa nih a thim hna i rian a fial tik hna hnu ah cun an nunlam an i thleng dih cikcek i “Nunthar” in Bawipa rianthiang kha an ttuan hna. Bupi chung zongah rian a ttuan mi le dai tein thil a zohkhenh i khua a khang tu hna zong an um ve.

                Chungkhar cio hna zong nih zoh chunh awk tlak tak tak an si. Nu le pa hna nih rian lawng ttuan in chungkhar caah khua a khangtu (management) a tuah tu an um lo a si ah cun an ttuan kawl hnawl mi hna an lo dih zau ko lai. Kap khat le kap khat “Harmony” tein um thiam a si ah cun chungkhar nuam pakhat kan ser khawh cio ko hna lai.

               

 

Add new comment

1 + 17 =