Mithmai hmuh duh ah maw?

Nihin thawngtha bia kan theih mi (Mark 10:32-45)kan zoh tikah, James le Johan unau hna nih Bawipa sinah tthutden, reng an hal nak kong kan theih. Zei ruangah dah a si hnga? Kan Bible cathiang chungah Johan cu Bawipa nih a dawtmi a si nak kong tampi in kan hmuh khawh. Sihmanhsehlaw, zei ruangah dah James le Johan nih mah bantuk sining hi an hal hnga? Hawi dang zultu hna zong nih zei tin dah an ruah ve hnga?(Mark 10:41).

Bawipa nih fiang tein le mithmai zoh lo in bia a leh hna. “Zeicahtiah Mi Fapa hmah hi rian ttuanpiakmi si awkah ka rat ttung lo, midang rian ttuanpiaktu si awk le mi tampi tlanhnak ding ca I ka nunnak pek awkah pei ka rat cu” tiah a ti hna(Mark 10:45).
Khrihfa hna kan nunnak hi zei dah a si? Vawlei mithmuh le minung sining in kan zoh a si ah cun bawi si a duh mi lawng te kan si. Kan caah rian kan ttuan piak hna seh. Him tein um u sih timi lawng hi kan duh cio mi a si. Sihmanhsehlaw, Pathian hmuh ning ah cun a dang pi in a si kha kan hmuh. Hi vawlei cung kan nun caan te ah hin midang caah siseh, miphun caah siseh i pekchanh rianttuan nak in Van cung ram nuam kan phanh tikah Pathian nih a duh mi zungzal kan tuah khawh nak hnga ding caah kan cawng cuahmah hna ti hi theih ding a si.

Pathian nih a duh mi cu “Dawtnak” a si bangin dawtnak thinlung hi sermi thil vialte cungah langhter hna u sih. Zeicah kan ti a si ah cun “Pathian cu dawtnak a si”(1 Jn 4:8). Dawtnak cu Pathian Thlarau in a ra mi a si (Gal 5:22). Dawtnak thawngin khamh kan si bangin Dawtnak thawng in daihnak zong a um.

Rianttuan tti tu hna cungah siseh, sermi thil vialte hna cungah mah zawn lawng ruah lo in dawtnak ngei hna u sih. Bawipa nih a nunnak pek tiangin a kan dawtnak kha a langhter cang. Hawi kom cung ah siseh, sermi thil hna cungah siseh, dawtnak in a nung kho i Pathian sunparnak a langhter kho tu si khawh i zuam zungzal hna u sih.