Na Chungkhar zeitindah na Hruai?

Sernak hramthawh ka tein pakhat le pakhat i ṭhen ding timi hi Pathian programe ah a um lo mi a si. Aa ṭhi-ummi nu le va kong zongah siseh thih tiangin pakhat le pakhat kar lakah daw tein um ṭi dingin rak tinh mi a si. Sihmanhsehlaw pakhat le pakhat i rualrem tein um ṭi ding programe cu tukforhtu Satan nih a hun hrawh tikah Pathian le minung khar ah siseh, minung le minung kar ah siseh ṭhennak a hung chuak. Cuticun chungkhar chung zongah nu le va ṭhennak tibantuk hna hi a hung um nak a si. Pathian nih cun nu le va pakhat le pakhat cungah zumhfek tein thih tiang um ṭi dingin a tinhpiak mi a si ko. 

Zei ruangah dah cheukhat aa ṭhium mi hna hi an i ṭhen ṭhan lengmang hnga? Zei ruangah tiah cun an i ṭhitumhnak ah Pathian aa tel lo caah a si. Pathian thluachuah an auh lo caah a si i Pathian sinah an programe an ap lo caah a si. Pathian hmai ah an tuahmi a thianghlim mi le a sunglawi mi biakam-ṭhit-umhnak kha tukforhnak an ton tikah an philh caah a si. Hihi nu le va i ṭhennak ah a hrampi zong a si.  

Pathian kha a ṭihzah i aa bochanmi hna chungkhar ah cun nu le va ṭhennak timi hi a um kho lo. Zeicah tiah cun Pathian an sinah a um caah a si.

Tobit fapa Tobias cu Sarah he an rak i um. Tobias le Sarah cu an i ṭhit-umh ka tein, an chungkhar caah Pathian sin bawmh nak an rak hal. Tobias nih ‘Kan pupa hna i Pathian, rili nih siseh, cerhti hna le tiva hna nih sihna seh, a chung um thilnung saram vialte nih si hna seh, nangmah kha in thangṭhat ko hna seh. Bawipa nangmah cu Adam kha leidip in na ser i amah bawmtu dingah Eve kha na rak serpiak. Atu zongah keimah cu nupa sinak menmen caah ka farnu Sarah hi ka ṭhiṭmi asilo, fale le tefa hmuhnak ding caah annih thawngin Bawipa na min cu zungzal donglo an in thangṭhat khawhnak caah a si’ tiah thla a rak cam (Tobit 8:7-11). Cu hlaan Sarah he aa ṭhi um mi vialte hna cu khuachia nih a rak nawn dih ko hna nain Pathian sinah bochannak le zumhnak he a programe vialte a aptu Tobias cu thihnak in luaṭer a rak si. 

Pathian aa bochan duh lomi hna le Pathian cawnpiak mi zong a zul duh lomi hna innchungkhar cu Satan kha hmunhma ṭha a pe mi chungkhar an si. Satan tukforhnak nih a tei cang hna a si ah cun nu le va kar lak ah siseh, chungkhar chungah buaibainak a um peng ko lai. Cun Satan zong nih an chungkhar a hrawh ta hna hlaan chung paoh cu a kal tak bal fawn hna lai lo.

Cuasicaah Jesuh Khrih, Pathian kha chungkhar lubik can ah chiah zungzal ding a si. Zeitin dah kan chiah hna lai tiah cun chungkhar tling tein Missa raithawinak ah tel khawhnak in chiah khawh a si ko. Chungkhar tling tein thlacam ṭi nak in siseh, Pathian bia i hrawm ṭi nak in siseh zumhfek tein le fel tein tuah ṭi zungzal ding a si. Cuticun tukforh tu ral ṭhalo cu kan tei khawh ko lai.