Na duh ahcun na ka thianter khawh

Photo Credit

 

Voikhat nak Bible – Hebrews 3: 7-14

Thangtha Bia  - Mark 1: 40-45

Jesuh sinah cun thinghmaimi pakhat kha a ra I a khuk aa bil i: “Na duh ahcun na ka thianter khawh”  tiah bawmhnak kha a hal. (Mk 1:40)

  • Nihhin kan theih mi kan rel mi Psalm chungah; Bawipa aw kha ngaih ding le kan lungthin hna kha hahter lo dingin a kan cawnpiak. A caan ah cun thil sining tein tuah ding le chim ding kan theih ko na in kan zangder ruangah tuah lo in kan tolh theu tawn.
  • Midang pakhat nih thil tha a tuah kan hmuh a si ko zongah, kan mah lei in thazang cuah ve ding le i zuam ve ding kan theih ko a si zongah lungthlen nak ngeih lo in kan um theu tawn. Vawlei cungah zohchunh awk tlak a si mi hna konglam kan zoh tikah kan mah pakhat cio bangin harsatnak a tong mi le zangdernak a ngei mi an si cio ko hna. Sihmanhsehlaw, an zangdernak chungah lawngah dir lo le taan lo in teikhawhnak hnga ding caah an i zuam tikah zohchunh awktlak minung hna ah an cang cio hna. Bupi chung kan hun zoh tthan a si ah cun, mithiang hlim kan ti mi hna (saints) tampi an um. Minung an si ve bangin tukforhnak phuntling a tong mi an rak si ve ko. Sihmanhsehlaw, Bawipa an dawtnak nih an mah pumpak duhnak kha a tei tik ah thlarau lei in thangthat awk tlak le zohchunh awk tlak minung ah an cang hna.
  • A cung lei langhter mi minung hna nunzia kan zoh than tikah, lungtthawnnak ngeih lo in a lungthin aa thleng i, a nunzia aa niamter i, toidornak lungthin he thil sining tak le Pathian duh ning in a nung mi hna an si kha kan hmuh khawh.
  • Mithiang hlim hna cu an nun lio caan an ton mi harsatnak hna kha dawtnak lungthin, toidornak lungthin le nunzia nem tein Pathian duh ning a zultu hna kha an si.
  • Thinghmui pa nih Bawipa sin ah damnak a hmuh thannak hnga ding caah a hal tikah Bawipa nih damnak a pek tthan. “Na duh ahcun na ka thianter khawh”tiah a hal mi te hi kan lungchung cio ah i cin ken zungzal hna u sih. Bawipa nih kan caah thatnak a si mi paoh cu a duh mi a si. Kan mah duhnak lawng hal lo ding le tuah lo ding zong philh lo ding a si. “Na duhnak bang si ko seh” (Matthew 6:10; Luke 1:38). Kan mah duhnak lawng hal lo in Pathian duhnak kan cungah a tlun khawh nak hnga hmunhma pe hna u sih.
  • Thla kan cam hnga ding mi cu: “Maw Bawipa, ruamkai duhnak lungthin siloin toidornak lungthin he na rian ka ttuan khawh zungzal nak hnga caah thluachuah kan pe ko sawh” tiin thla cam hna u sih.

Add new comment

2 + 0 =