Na hmuhmi thluachuah Man ngeihter

Photo Credit

“Zeicahtiah a ngeimi cu chap chin an si lai i a hleivuang an ngeih tiangin an ngei lai; sihmanhsehlaw zeihmanh a ngei lomi cu a ngeihmi hnihchunte hmanh kha chuh a si lai.”(Matt 25:29)

Nihin kan rel i kan theihmi cathiang cu (Matt 25:14-30) a si i “Vancung Pennak cu khualtlawn i aa thawhmipa bantuk a si. A salle kha a kawh hna i a thilri kha nan rak zohkhenh lai, tiah a ti hna i anmah le an thil ti khawh ning cio khan ngun tangka a pek hna,” tiin kan hmuh. A pek hna mi tangka in khan sal pahnih hna nih cun an thil ti khawh ning cio in khan a let in an karhter khawh i an Bawipa sinah hmaihngal tein an hung chuak kho. Pathum nak salpa tu nih cun zohkhenh dingah a sin ap mi tangka kha vawlei khur chung tu ah a rak phum ziar i zeihmanh karhter loin amah ning kel tein khan a rak put ṭhan. A sin ah ap mi tangka in khan zeihmanh a tuah nak lo.

An Bawipa a khualtlawnnak in a hun phanh tikah a salle cu a kawh hna i an thil ti khawh ning cio in khan laksawng a pek hna. Sihmahsehlaw zeihmanh a tuah lomi salpa tu kha cu a ngeihmi hmanh kha chuh ṭhan a si hlei ah “hi sal santlai lopa hi a leng khuamui lakah va hlonh u; khika ah va ṭap seh law a hacang va rial len seh,,” tiah a bawipa nih a hlawt kha kan hmuh khawh.

Hi Jesuh cawnpiakmi bianabia hi kan theih lengmang mi bianabia a si ko men lai. A sullam kha ṭha tein kan ruah ṭhan a si ahcun hi cawnpiaknak bianabia hi kan caah chimmi lawng te an si kha theih khawh le hmuh khawh a si. Pathian sinin kan hmuh mi kan caan, kan chawva, fimnak le thiamnak, tibantuk hna hi tampi an um ko. Zeitindah kan hman hna?

Hi bianabia nih a kan cawnpiak duhmi cu ‘kan nunnak a dih tiangin Bawipa Pathian caah nun ding le rianṭuan ding a si kha fiang tein a lang ko. Zeicah tiah cun kan zeizong vialte hi Amah Pathian sinin a ra mi lawng te an si caah a si. Kan ngeihmi vialte zong hi Amah ta lawng te an si ko.

Bianabia chung i kan hmuh mi sal hna bantukin kan sinah pek a simi le zohkhenh dingah ap a si mi hna hi cu chikhat hlanh mi lawng te an si ko. Pathian nih a kan hlanhmi le a kan pek chungmi hna hi ṭha tein kan zohkhenh ding an si.

Hngalh ding a simi cu, Pathian sinah zeitluk tam dah pekchanh ding thilri-chawva kan ngeih timi nak in ka ngeihmi hna chungin zeitluk in dah siannak lungthin he Pathian sinah pek kan duh timi hi a biapi deuh mi a si ko.

 

Add new comment

4 + 2 =