NA INNCHUNGKHAR NINGCANG TEIN A UM MAW? 

“Na innchungkhar kha a ningcang tein chia tuah; nang cu na nung lai lo, na thi ko lai.” (2Siang 20:1) 

Nunnak kongkau hna chungin a ṭhen cheu cu thihnak caah timhtuah awk kha a si. Hezakiah Siangpahrang pa cu thihnak kutka hram ah a dir cang. Arauh hlan ah Pathian hmai chuahpi a si cang lai. Zeidah ka rak tuah timi cazin a fianter cang lai. Asinain amah nih a donghter rih lomi ṭuanding mi rian a um rih. Cucaah Pathian nih Profet Isaiah kha a thlah i “Na innchungkhar kha ningcang tein chia tuah” tiah ralrin a pekter. 

Hezakiah Siangpahrang le Pathian an i komh (pehtlaih) nak kha heichia rih usih law kannih nih Hezakiah Siangpahrang bantukin innchungkhar rian kongkau ah mithmuh kut tongh a si mi tuah ningcang tete kha ningcang tein ruah damh awk kan herh. Anih nih a cungah hliamsual nak hna ngaihthiam ding kha a chambau kho men. Mi nih ngaihthiam awk hal ding zong a herh kho men ve. Amah caah thawisa le Pathian rianṭuan piaktu minung pakhatkhat kha lawmhnak bia chim ding a herh kho men. 

Zeikhom a va si ah a fiangmi pakhat cu, a innchungkhar kongkau biachah nak ah a ro cotu minung hna caah ruah in phaisa kongkau leng in, phungning a si mi thil hna zohkhenh kilven piaknak zong aa telchih lai. 

Hika zawn ah hin kannih zong profet Isaiah nih ralrin a peknak bia kha ṭhatein kan cinken i kan zulh a herh. Zeicahtiah kannih cu Pathian sal le kan si bantukin kan unau, chung khar kan hawikom hna kha bawmhchanh awk le thilri chawva hna kha ṭha tein timhtuah tuaktan khawhnak, a dingfel mi chawkeengtu kan si awk a si. Ningcang loin um, ningcang loin ei, phunglam zulhphung ngeihlo, ṭuanvo tlolh in nunnak hna kha kan hrial awk a si. 

A rau pah cang. A luan cia kum saunawnpi ah khan a si. Ka hawipa pakhat nih a fale pathum kha ṭha tein phihmi cabawm pakhat cio a phawt hna i amah a thih tikah awng-phem cio ding a cah hna. Culio ah amah a tuah ning cu a herh lomi a lo ngai. A nih cu zaanglek mi pakhat bantukin a pum he a lungthin he a fekmi a si lengah a kaum zong cu kum 60 hrawnghrang a si rih. 

Asinain a rauh hlan ah ka hawipa cu sizung ah an chiah. Hleice thlop sibawi ngan hna nih zeitluk in i zuam hmanh hnasehlaw a um tuning cu rianrang in a zual chinchin. Sau a rau lo, ni thlawmpal ah a thi. 

Hmailei an nu caah an lungretheih le ruakvuinak kongkau ah an lung aa tuai he an ngaihchiat lungretheih hleiah tantakmi innchungkhar hna cu tangka kongkau thawkin, thilri chawva ngeihnak hna he pehtlai in kuttongh ningcangte a simi biachahnak hna he an ton. 

Cutikah annih zong cu an herhmi thawng sining cang theih dingin an cabawm cu rianrang in an awng-phem cio. Rovuihnak ca, tangka kongkau he pehtlai mi dikthliar hna, a biapi mi ca hna kha zeitindah nan rak kawl lai timi aa tel kha an hmuh. (Cu ca chungah a rak i ṭial dih cu ta.) 

Asi kho lai lo timi thil pakhat nih amah tein a tlam a tlin bantuk khi a rak si. Zeicah kan ti ahcun ka hawipa nih hin a innchungkhar kha ningcang tein a rak chiah caah a si. 

Hezakiah Siangpahrang sinah Pathian nih a rak pekmi ruahnak kha zei rel lo dingah aho Khrihfa pakhat hmanh nih a kum a no tuk rih caah, Pathian biaknak lei aa pumpe tuk caah ti a um lo. Zei e...! 

“Na innchungkhar kha ningcang tein chia tuah. Nang cu na nung lai lo. Na thi ko lai” timi hen ta! A rauh hlanah kanmah caan a phan ve cang lai. Cu tikah kan nih zong kan cazin kan fianter ve te lai.

‘Na innchungkhar ah lungawṭawmnak na ngei maw?’ ‘15 your house is order?’ by David J. Pavey from “QUIET, PLEASE!” God sometimes whispers (Pp. 72-73) kha lehmi a si. 

/- Norbert Ca Ling- OSC