Na Lung Dong Hlah

Nihin Thawngthabia chung kan rel kan hmuh mi ah Jesuh a khua a phanhnak kong a si (Matt 9:1-8). A khuami pawl nih Jesuh khua a phak an theih tikah an i lawm ve i a sinah tampi an ra hna. Cun Jesuh nih khuaruahhar thil a tuah khawh mi cungah zumhnak an ngeih caah a dam lomi, mizengpa pakhat zong kha ihkhun in an rak zawnh i Jesuh sinah an rak rat pi. Cutikah Jesuh nih mizengpa cu a thawh i: “Ka fapa, na lung dong hlah! Na sualnak cu ngaihthiam na si cang,” tiah a ti.

Cu lio caan ah cun Phungbia cawnpiaktu saya a cheukhat zong an rak um ve. Jesuh nih hitin a chimmi bia kha an theih tikah, “Hi pa hi Pathian serhsat in bia a chim,” an ti. Jesuh nih thil thalo an ruahmi kha a hngalh i, “Zeicahdah cu bantuk thil thalo cu nan ruah? Na sualnak cu ngaihthiam na si cang, ti cu maw a fawi deuh Tho law kal tuah, ti dah a fawi deih? Mi Fapa nih vawlei cungah hin sual ngaihthiam khawhnak a ngei ti khan kan hngalhter hna lai” a ti i mizengpa cu, Tho law, na ihkhun kha i put law inn ah va tin” tiah a ti. Hi khuaruahhar thil sining a hmu tu khuami hna nih cun “cu bantuk nawlngeihnak cu Pathain nih minung kha a pek hna caah Pathian cu an thangthat” tiah a ti. 

Kan nih kan kar lak ah hin tah Farasi mi hna le Phungbia cawnpiaktu saya hna he aa lo mi lungput kan ngei sual maw? A ngei mi zong kan um kho ko men lai. Pakhat cio kan nunnak ah kan chunglei in Phungbia cawnpiaktu saya hna bantuk ruahnak thalo a hung um tikah Pathian sermi thil hna le midang hna cung ah sual puhnak lawng tein in kan lung chungah a khat sual maw? Pathian cungah tah serhsatnak bia kan chim sual maw?

Phungbia cawnpiaktu saya hna bangin kan chung i a ummi thangchiat duhnak lungthin le sual puh duhnak lungthin hna kha kan i sum thiam a herh. Thangchiatnak nih zeibantuk thathnemhnak hmanh a chuahpi lo. Mi kong ceih duhnak hmurka, ruahnak thalo le thangchiat duhnak lungthin hna kha kan i sum khawh hna a si ahcun Pathian duhnak thil hna kha midang hmai ah kan langhter khawh deuh ko hna lai. Cun kan mah pumpak zong thlarau lei in siseh, taksa leiin siseh kan dam deuh ko hna lai.