Na Ngaihthiam hna bangin Ngaihthiam na si ve lai

Kan Pathian cu zangfah a thiammi Pathian a si. Zeitluk in a sualmi minung si ko hmanh hna u sih law a kan ngaihthiam khawh zungzal ko. Sihmahsehlaw sual ngaihthiamnak timi ah hin ngaihthiam a simi hna lei kap in tuah ding le zulh ding tete cu an um ve. Hi kong he pehtlai in nihin ni caah bupi nih a kan thimpiakmi cathiang (Matt 18:21-19:1) chungin “ngaihthiam duhnak a ngei lomi salpa bianabia” in a kan cawnpiak. 

Siangpahrang pa nih hawidang sal cungah ngaihthiam duhnak lungthin a ngei lomi salpa konglam le sining a theih tikah a thin a hung ngaingai i a rannak in cu salpa cu thongah a thlak. “Sal ṭhalo, na ka nawl caah na ka batmi vialte kan ngaihthiam dih. Na cung i zaangfahnak ka ngeih bantukin pei na sal hawi cungah na ngeih ve awk a si cu,” tiah Siangpahrang pa nih cun a ti. Hi tahchunhnak bianabia he pehtlai in Jesuh Khrih nih, “Nannih nih nan u nan nau kha nan lungchung taktak in nan ngaihthiam hna lo ahcun cu bantuk cun vancung khua i a ummi ka Pa nih nannih zong cu an tuah ve hna lai,” (Matt 18:35) tiah a ti hna.

Cuasicaah Pathian nih kan sualnak kan ngaithiam seh ti kan duh a si ahcun kan cungah sual-palhnak a ngei, a tuah mi hna kha kan ngaihthiam hmasat hna a herh. Jesuh nih thlacam ning a kan cawnpiak nak ah kan cam ṭheo mi cu, “Mi nih kan cungah ṭhat lonak an tuahmi kan ngaihthiam hna bangin kan ṭhat lonak cu kan ngaithiam ve ko,”(Matt 6:12) timi hi a si. Hitin thla kan cam tikah kan lungchung tak tein kan cam taktak hna maw? Kanmah lei nih kan cung sualnak a tuahmi hna ngaihthiamnak lungthin kan ngeih lawngah sual ngaihthiam kan si ve ko lai. Sualnak a lianh le a hmet, a tlawm le a tam kha zoh loin ngaihthiam ding a sinak kong kha Jesuh nih Peter biahal mi a leh nak ah khan kan hmuh khawh: “Sihlah, voi sarih si loin voi sawm sarih voi sarih,” tiah a ti. A sullam cu ngaihthiam zungzal ding a si tinak a si. Kan cungah a sualmi hna kan ngaihthiam hna tluk khan Pathian zong nih a kan ngaihthiam ve ko lai.

Theih ding thil pahnih (2) a ummi cu: toidornak lungthin he Pathian sinah sual ngaihthiamnak hal zungzal ding le kan cungah sual-palhnak a tuah mi hna kha ngaihthiam zungzal ve hna ding hi a si. 

Pawngkam a ummi minung hna dawt khawh ṭung loin Pathian kan dawt timi cu a si kho lomi a si. Jesuh Khrih nih: “Na innpa kha nangmah naa dawt bantukin na dawt lai”(Mk 12:31) tiah a ti. Mithiang Paul zong nih hitin a ti ve: “Na innpa kha nangmah naa dawt bangin va daw. A innpa a dawtmi nih cun a innpa cungah ṭhat lonak a tuah bal lo. Cucaah nawlbia tling tein zulh cu dawt hi a si ko”(Rom 13:9-10) tiah a ti.