Na sining i philh hlah

“Khua a dei tikah a zultu kha a kawh hna i hleihnih a thim hna i lamkaltu tiah a ti hna.” (Lk 6:13)

Jesuh nih zultu 12 a thim hna nak nih hin ruahnak zeitel an ngeihter mi a um ve maw? Zei ruangah dah a thim hna hnga tiin teh na ruat bal ve maw?

Judas Iscariot dah ti loin cun a dang zultu 11 hna nih hin Jesuh cungah zumhfek tein an nun a dih tiang tehte a kang mi lawng te an si. Cun tehte an khaan ning zong aa dang cio fawn. Thah a tong mi an um bangin thong thlak a tong mi hna zong an um. Sihmanhsehlaw Jesuh hnu an zulhnak ah an nun a dongh tiang zumh fek tein an umnak ah hin an i lo dih cio ko hna. Zei ruangah dah zultu hna nih Jesuh cungah siannak lungthin ngeih in an zulh khawh hnga?

Jesuh nih a zultu hna a kawh hna i a thim hna nak sullam cu amah he umter zungzal a duh hna caah a si. Amah Jesuh he a ummi hna paoh cu himnak an hmu. Judas Iscariot tu cu a thli tein Jesuh a kal tak lengmang tu a si caah Satan nih a tlaih khawh i amah hriamnam tu ah a rak ser khah. Jesuh le an phu hna he a um zungzal tu zultu dang hna cu an him hna khah.

Dawtmi u le nau hna, kan nih hna zong zei ruangah dah Khrihfa pakhat sining in kawh kan si ve hnga? A fiang ko. Jesuh nih amah he umter ṭi a kan duh caah a si. Vancung Pennak coter ding a kan duh piak caah a si. Kan thlarau khamh a duh caah a si ko. Sihmanhsehlaw kan mah lei kap in Judas bangin kan um sual a si ahcun kan thi ve sual lai. Jesuh he ka um ṭi lawngah himnak kan hmu kho lai. Jesuh he kan um ṭi lawngah tukforhnak kan tei khawh lai i himnak hmun ah kan i din kho lai. 

Jesuh he um ṭi zungzal ding caah kawhmi le thimmi Khrihfa kan si kha i philh lo ding a si.