Na thin phang hlah!(Lk 1:30, Matt 1:20, Lk 1:13)

Nihin ni caah Bupi nih a kan thim piak mi cathiang cu (Matthew 1:18-25) a si i chungkhar thinphannak kong ti zong in ti khawh a si.

Pa he aa hngal rih lo mi Mary nih nau a pawi timi thawngpang Joseph nih a theih tikah Joseph nih zei tin dah a lung chungin a ruah timi kong zong nihin cathiang chungah fiang tein kan hmuh khawh. Mary nih nau a pawi tikah a nu siloah a chungkhar aa theih hngalh taktak mi zong a chimh cang ko men hna lai. Joseph nih Mary nau a pawi nak kong a theih tikah minung sining in a celh hrimhrim ve lo i Bible chungah kan hmuh bangin mitha mi, “thil a hmaanning in tuah a duh zungzalmi a si” (Matt 1:19) caah Mary zong kha ningzahter a duh lo i a thli tein ka let lai tiah khua a ruat ve.

Mary nih Pathian vancungmi sin in nau a ngeih hnga dingmi kong a theih tikah a thin a phang ngaingai ve. Cuti thiamthiam in Joseph zong Pathian vancung mi nih a mang in Jesuh chuah lai nak kong bia a chimh tikah a thin a phang ngai ve hnga i lungawtawm in a um ve ko hnga. Zekhariah zong Pathian vancung mi sin in Johan a chuah lai nak kong a theih tikah lungawtawm in a um ve. Sihmahsehlaw Pathian nih cun minung hna khamhnak ding caah program a suai cang mi cu tling lak in a tuah ko.

Kan nih hna zong hmai lei caan ah zeibantuk kan si te lai timi hi ahohmanh nih kan thei dih kho lo. Minung pakhat khat nih thawngpang a tha taktak mi ruah lo pi in kan chim ve hna sehlaw, kan zum dih kho ve men hna lai lo. Sihmahsehlaw Pathian nih kan caah program ttha a kan ngeih piak zungzal ko timi hi zum cio ko hna u sih. Zeicah kan ti a si ah cun “a Fapa ngeihchunte hmanh kha siang tein a kan pek” (Jn 3:16) caah a si.