Nan ral kha va daw hna u law an hremtu hna kha thla va campiak hna u : Matt 5:43

Bawipa hnu zultu hna le a zullo mi hna karlak ah zeibantuk thleidan nak dah a um? Cun Khrihfa a si mi hna le Khrihfa a si lo mi hna karlak ah zeibantuk thleidan nak dah a um?

Bawipa a vel (Grace) hi a si ko. Kan cung i tthat lonak an tuah ser ning bangin an cungah tauh ve lo khi a si. Khrihfa a silo mi hna nih Khrihfa hna cungah tthat lo nak an tuah zongah, Khrihfa a si mi hna nih cun Pathian sermi minung sining, Pathian muisam in sermi sining hmuh i tthat nak lei tu in cawnpiak le intuar piak a si. Zeicah kan ti a si ah cun, Bawipa cu mittha cungah siseh, mittha lo a si mi hna cungah siseh a dawtnak kha aa tluk cio in a kan pek caah a si (Matt 5:45). Khrihfa hna zong nih Bawipa dawtnak an cohlaan mi kha midang cung zongah an langhter ve caah a si.

Pathian cu kan tthat cembik nak hmun kha a kan zoh piak bangin midang cung zongah an tthat bik nak hna kha hmuh kawh le theih khawh ve i cohlaan thiam ve dingin lam a kan hmuhsak tu le a kan cawnpiak zungzal tu a si. “Mi nih kan cungah tuah hna seh ti nan duh bantuk khan midang cung zongah va tuah ve u” (Matt 7:12) tiah Bawipa nih a kan cawnpiak mi hi thil tthalo kha thil ttha in tei khawh nak hnga ding caah a si. Kan cungah tthat lo nak an tuah tikah zeitindah tthat nak cu kan tuah piak ve khawh hna lai ti zongin ruah khawh a fawi. Sihmanhsehlaw, Bawipa nih a kan cawnpiak mi cu: “Hihi minung caah cun a si kho lo, sihmanhsehlaw Pathian caah cun zeizong vialte hi a si kho ko”(Matt 19:26) tiah a ti. Mithiang Paul zong nih: “Ṭhawnnak a ka petu Khrih thawngin thil zeipaoh ka tuah khawh ko hna” (Phi 4:13) ah a ti ve.

Cu a si caah, Bawipa cungah siseh, na innpa cungah siseh na dawtnak tthanter chinchin na duh maw? Bawipa Thlarau na chungah hmunhma pe law na rauhnak, na tuak taannak hna le midang cung i na ngeih tawn mi rauhnak ttha lo hna kha “ka thlen piak ko” tiin thlacam zungzal ko. “Kan Bawipa Jesuh Khrih thawngin teinak a kan petu Pathian cu thangṭhat si ko seh” (1 Cor 15:57).

Add new comment

7 + 3 =