Nan thinphang hlah u

“Cucaah nan thinphang hlah u: nannih cu pithlung tampi nakin tampi in nan sung deuh” tiah a ti(Matt 10:32).

A kan dawtu le a kan zohkhenhtu hna pawngkam kan um a si ah cun kan hna a ngam i kan him lai ti kan zumh. Rili kam ah lente aa celh mi ngakchia pakhat nih tilet a hun kai (wave) a hmuh tikah a ttih i rili kam a san deuhnak ah a tli. Rili kam i a hawi dang ngakchia hna nih “ttih hlah, rak ttum law kan sinah rak i nuam ve” an ti len ko zongah ngakchia pa nih cun a zum hna lo i a ttum duh lo. Cu lio te ah cun a pa a ra i “ka fa, ra ttum, keimah he kan kal tti lai” tiah a ti tikah ngakchia pa cu a rak ttum i a pa sinah cun a kal ve.

A kan dawtu hna le bochan awk tlak ah kan ruah mi hna kan pawngah an um a si ah cun kan hna a ngam i ttihphannak kan tei khawh. Cu ve bangin a kan daw zungzal tu Pathian kan sinah a um zungzal timi zumhnak nih hin kan thinphan thlalau nak hna hi a kan tei piak khawh i kan hna a ngam tawn. Harsatnak kan ton caan zongah Pathian kan i bochan caah Amah sinah thla kan cam i thluachuah kan hal hna.

“Nangmah cu ka caah a sungmi nasi i upatnak kan pek i kan dawtmi na si. Na thinphang hlah -  na sinahka um ko” tiah Bawipa nih a thim mi a phun hna kha thazang a pek hna (Isaiah 43:4-5). “Hihi philh hlah u: nan sinah a zungzal in, caan dongh tiangin ka um lai” tiah Jesuh nih Pathian thimmi miphun thar a si mi kan nih hna zong bia a kan kamh ve (Matt 28:20). “Bawipa cu tuukhal bantukin a ka vengtu a si, ka herhmi vialte kha a ka pek dih”(Ps 23:1) tiah Psalm cattial tu pa nih a phuan ve. Kan thin a phan ruangah le kan ttih ruangah thil a hung si taktak mi hna nak in kan lungre kan i theihter mi le fahnak kan i pek mi hi a tam deuh tawn. Thinphan thlalau nak hna kha kal tak in a tu kan sining kan nun caan te ah hin lunglawm tein Bawipa caah nun ding a si. Lunglawmhnak kan ngeih khawh ding zongin i zuam ding a si. “Zeihmanh nan lungre i theihter hlah u, zeihmanh fahnak i pekter hlah u” tiah phungchumtu nih a ti(Phungchimtu 11:10).

“Tuurum hmete hna, nan thinphang hlah u! Zeicahtiah han Pa nih Pennak cu nanmah kha pek an duh hna” tiah Bawipa nih a kan ti (Lk 12:32). Bawipa cungah kan zumhnak tthanter han u sihlaw ttihphannak hna cu an lo ko hna lai.