Nang teh zeitin na ruah ve?

Jesuh Khrih cu a zultu hna he a dang tein an um caan paoh ah tangdornak lungthin ngeih ding kong hi a rak cawnpiak zungzal hna. Lungthin ttha a ngei mi hna cu zeitik hmanh ah anmah le anmah midang cungah siseh, midang hmai ah langh le lar a duh mi an si lo. Mi hmuh lo zongah an tuah hnga ding mi le an ttuan hnga ding mi hna kha ttha tein a ttuan zungzal mi an si.

Kan nih Khrihfa mi hna zong nih midang hna kha upatnak lungthin he kan chawnhbiak hna zungzal ding a si. Kan Bawipa Jesuh Khrih nih zultu hna ke a ttawl piak hna nak zong hi, Amah zultu si a duh mi hna cu tangdornak lungthin ttha ngeih ding a si timi hi a cawnpiak duh hna ruangah a si(Jn 13:4-5). Cun amah nih a tuah bangin midang cungah tuah ve awkah a zultu hna a fial hna bangin kan nih Khrihfa mi hna zong cuticun tuah ve ding in a kan fial.

Hruaitu si a duh mi nih cun thleidannak lungthin ngeih lo ding le tangdornak lungthin ttha he rianttuan awk a si ti kha kan theih cio awk a si. Cun Jesuh nih a kan fial rih mi cu, “Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. Pakhat le pakaht nan i dawt ahcun mi vialte nih, hi hna hi amah a zultu kha an si, tiah an in hngalh hna lai” tiah a ti hna(Jn 13:34-35). Nang teh zeitin na ruah ve?