Nangmah nawl a si - Matthew 13:54-58

Nihin kan theih mi thawngthabia chungah “Jesuh cu a rak umnak khua Nazareth khua ah khan a kal” tiin kan hmuh. Hi zawn ah hin tha tein kan zoh a si ah cun Jesuh nih a rak thannak le a rak tlawnlennak khua zeitluk in dah a dawt timi kan hmuh khawh. Jesuh Khrih cu Pathian taktak a si ko. Sihmanhsehlaw, thawngthabia a rak chimphuannak le a rak tlawnlennak vawlei cung ummi kan nih vialte hna zong hi a kan dawt tuk hringhran ve ko timi hi theih ding a si. 

Jesuh nih a kan dawtnak cu zeitindah kan hmuh, kan theih khawh tiah cun, kan thlarau a thih lo nak hnga ding caah lam ding le lam hmaan zulh dingin a kan cawnpiak zungzal nak ah hin kan hmuh khawh. A rak umnak khua a phak tik zongah a tuah hmasa mi cu “An i pumhnak inn ah khan a kal i a cawnpiak hna” tiin kan hmuh. Cun a cawnpiak nak le “a bia a theimi cu an lung a suk ngaingai hna” ti zong in kna hmuh khawh rih. Zeicah kan ti a si ah cun minung nih kan herh bikmi le tihal in kan hal bikmi ti-rawl cu, thlarau rawl, Pathian bi a si caah a si. 

Sihmanhsehlaw mi pakhat khat nih zeitluk hmanh in thatnak tuah ko hmanh sehlaw a mawhchiat tu le a thangchiat tu cu pawngkam ah auh hau loin an um zungzal tawn nak kong zong hmuh khawh a si. Jesuh nih cun an caah thatnak a tuah piak ko hna nain khuami mi cheukhat hna nih cun an cohlang duh lo. Nahcuahnak lungput an ngeih ruang zongah a si khomi a si. “Hi bantuk fimnak hi khoika ah dah a vaa lak hnga?...Khuazei in dah hi thil vialte hi a vaa lak hnga?” an ti i cuticun an hlawt. Jesuh cungah zumhnak an ngeih lomi hrimhrim hi a thawng tuk. Cucaah “zumhnak an ngeih lo caah cuka ah cun khuaruahharnak tampi a tuah lo,” tiah thawngthabia tialtu nih a ti. Zei tluk in dah Jesuh a lung a fah hnga? Nang zong na khuami hna nih in congawih hna seh, in hlaw ve hna sehlaw zeitin dah na um ve hnga? Mah le khuami hna nih hlawt cu a fak tuk mi a si. Kannih hna zong hawt tong cio ve u sihlaw ngaihchiatnak, asiloah lungfahnak cu kan tuar hrimhrim cio ko lai. 

Jesuh Khrih cu a khua ah lunglawm ngai in a va kal ko; sihmahsehlaw a khuami hna nih an rak hlawt bantukin nihin ni caan zongah Jesuh Khrih cu Pathian sining in na sinah lunglawm thanuam ngaiin a ra lengmang ko. Na cohlang maw na hlawt dah? Lunglawm tein na cohlaan a si ah cun na cungah khuaruahhar thil tampi a tuah/a chuahter ko lai. Na hlawt a si ah cun khuaruahhar thil tampi a tuah lai lo.

Jesuh na sin a rat tikah na cohlang lai maw, na hlawt lai dah? Nangmah nawl a si.