Nawl ngaihnak

Kan nu le kan pa, cun biaknak lei in a kan hruaitu Siangbawi, Sisters, Saya, Pastor hna le Khrihfa upa hna nih kan sual-palhnak cungah kan cawnpiak hna sehlaw, asiloah sualnak tuah lo dingin kan thloh hna sehlaw an nawl kan ngai hna hnga maw? Hi tin ralrinnak bia a kan chimtu hna hi sual-palhnak lam kan zulh nak hnga lo ding caah Pathian nih a thlah mi hna zong si khawh mi an si. Bianabia ah ṭhat lonak lam kan zulh lo nak hnga ding caah chungkhat hna sin in maw, hawikom hna sin in maw, theih hngalhmi pakhat khat hna sin in maw tiin Bawipa nih a hman khawh mi hna zong a si.

Jesuh hi vawlei cung a nun lio ah mi pi a rak cawnpiak hna tikah “Nan sualnak kaltak hna u law Thawngṭhabia kha zum tuah u,” (Mk 1:15) tiah a rak ti hna. Jesuh cawnpiaknak cu micheu nih an rak cohlaan ko nain a cohlaang duh lomi zong tampi an rak um. Amah Pathian hrimhrim nih nunnak kong he pehtlai in a rak cawnpiak ko hna; sihmahsehlaw a rak cohlaang duh lomi zong tampi an rak um. A cohlang duh lo mi hna chung hmanh ah hin Pathian rianṭuan ka si tiah aa timi Farasi mi hna le Phungbia cawnpiaktu Saya hna zong tampi an rak i tel ve.

Nihin Missa thawinak ah kan relmi cathiang cu Luke 19:41-44 chungin a si i hi cathiang chungah Jesuh cu “a ṭap” (Lk 19:41) tiin kan hmuh. Zeicah tiah cun a dawtmi minung hna nih a cawnpiaknak an cohlaan duh lo caah a si, an theih lo caah a si. Jesuh nih Jerusalem khuapi lei hoih in: “Nangmah le na vampang kulh chung i a ummi minung hna cu an in hrawh dih cikcek han lai. Pathian cu nangmah khamh awkah a rat caan kha na hngalh lo caah cuka hmun ah cun aa chonhmi lung pakhat hmanh leh loin an kaltakmi a um lai lo,” tiah a ti. Jesuh cawnpiak nak kha rak cohlaang hna sehlaw zeihmanh harsatnak an rak tong hnga lo. 

Kan nunnak zong ah nunzia dawh tein nun ding le ṭha tein nun dingin nu le pa hna le Pathian rianthiang a ṭuantu hna nih cawnpiak lengmang kan si ko hna. Thlarau lei in siseh, pumsa lei in siseh nunnak kan ngeih nak hnga ding caah a si.  An kan cawnpiak nak hna kha ṭha tein kan ngai hna maw, kan zul hna maw? Jesuh cawnpiakmi teh kan zul taktak hna maw? Minung cu mah thisa duhnak in nun a duh deuhmi kan si caah kan ṭhatnak hnga ding caah a kan cawnpiaktu hna chimmi bia kan ngaih lo caan zong a um ko men lai. Sihmanhsehlaw a kan dawtu hna kha an ngaihchiaṭer hna hlah u si. Jesuh kha a ngaihchiaṭer hna hlah u si.

Jesuh cu a kan daw zungzal tu le ruahnak ṭha bik a kan pe kho zungzal tu a si. Amah cawnpiak nak kha ngaih hrimhrim ding le zulh hrimhrim ding a si. Jesuh bia kan ngaih, kan zulh a si ahcun thil ṭha kan co zungzal ko lai.