Nawl ngeihnak

“Zeicah tiah  Johan cu nan sinah a ra i a hmaanmi lam zulh awk kha an hmuhsak hna, sihmanhsehlaw nannih nih cun nan zum duh lo; ngunkhuai khawltu hna le hlawhhlangnu hna tu nih khan an zumh. Cucu nan hmuh hnu zongah nan lung nan i thleng duh ṭhiamṭhiam lo i amah kha nan zum duh hlei lo,” tiah a ti. (Matt 21:32)

Nihin thawngṭhabia (Matt 21:28-32) kan relmi ah Jesuh nih fapa pahnih a ngei mi pa tahchunhnak in a cawnpiak hna nak kha kan hmuh. Mipa cu mitsur dum a ngei mi a si i nikhat cu a fapa upa u sinah khan a va kal i, “Ka fapa, nihin cu va kal law misur dum ah rian va ṭuan,” tiah a ti. A fapa nih cun “Ka duh lo” tiah a rak leh. Sihmanhsehlaw a hnuah a lung a hun i thleng i mitsur dum ah cun a kal. 

An pa cu fapa hniang deuh pa sinah khan a va kal ṭhan i cu ti ṭhiamṭhiam cun a va ti. Anih nih cun, ‘E,e, bawipa,’ tiah a rak leh, sihmanhsehlaw a kal lo. Cu fapa hniang pa nih cun ‘ka pa ka kal ṭhan lai lo’ ti zongin zeihmanh a chim ṭhan lo. A pa kha a duh paoh in a hlen ti khawh a si.  

Jesuh nih hi bianabia hi zei ruangah dah a hman tiah cun a cawnpiak nak a ngaitu hna chung khan Jesuh kha tlaih a duhmi an um caah a si. Lungthin ṭha lo he a ngiartu an um caah a si. A ngiartu hna kha Jesuh nih fiang tein a chimh mi hna cu, “Hihi kan chimh hna: Ngunkhuai khawltu hna le hlawhhlangnu hna nih Pathian Pennak chungah an in luhkanh cang hna lai hih,” tiah a ti hna. Hitin a ti hna tikah Jesuh a ngiartu a simi biakinn ah rian a ṭuang zungzal tu hna le mipi kha a cawnpiak lengmang mi hna nih khan zeitlukindah an i fahsak hnga? Jesuh nih hitin a timi hna zong hi biaknak phunglam a zul ngaimi a lo mi hna le mipi nih an ṭih ngaimi hna kha an si ko. Sihmahsehlaw Jesuh nih cun a ṭih nemmam hna lo. Himi hna hi Pathian min hmang in mah zawn lawng aa ruatmi, sipuaizi a tuahmi, Pathian min a zuartu hna an si caah a si.  

Kan nih hna hi teh hi bantuk zer ngeihnak lungthin a ngeimi kan si ve sual maw? Pathian min hmang in sipuaizi a tuahmi, mah pawcawmnak a kawltu kan si ve maw? Pathian min hmang in mipi kha a ṭhihphoih tu kan si ve sual maw? Mah zawn lawng aa ruat mi kan si ve sual maw? Bawipa Pathian bia kha kan theih ko nain a let duh lomi kan si ve sual maw? Asiloah, a hnu ah a lungthin aa thleng ṭhan i Pathian duhnak a tuah ṭhan mi dah kan si?