Ngaihthaimnak

“Nannih nih nan u nan nau kh anan lungchung takta in nan ngaihthiam hna lo ahcun cu bantuk cun vancunga khua i a ummi ka Pa nih nannih zong cu an tuah ve hna lai” tiah a ti hna.(Matt 18:35)

Nihin ni caah bupi nih a kan thim piak mi cathiang cu (Matt 18:21-, 19:1) a si. A tlangpi in kan zoh a si ah cun “Ngaihthaimnak” kong a si.

Rawl chuan pah in piat kan aah pah ah kan kut kan i aah sual a si ah cun kan i hliam nak zawn te kha sii kan thuh, kan men i nihnih thum ah cun a dam tthan tawn. Lente celh pah in kan ngal kan i khawn sual tikah kan i khawn nak zawn te kha sii kan thuh i nihnih thum hrawng cun a dam tthan i a fah zong kan philh khawh tawn.

Pakhat le pakhat capo bia kan chim tikah a caan ah cun thinhunnak tiang a phaan kho tawn, sihmanhsehlaw caan sau a raoh hlaan ah kan philh khawh tawn ve. Pakhat le pakhat cungah sual palhnak a um tikah minung kan si bangin ngaihthiam khawh loin le philh khawh loin kan um caan zong a um tawn. Kan ngaihthiam khawh hna hmanh ah philh khawh loin kan um caan zong a um kho.

Nihin cathiang kan rel mi chungin Jesuh nih kan cungah sual palhnak a tuah mi hna ngaihthiam dingah a kan sawm. Kan zawt kan fah tikah siibawi te sinah kan i thlop tawn. Siibawi pa nih kan sining a kan hal hnu ah a herhmi bia hna zong a kan cah i sii a kan pek hnu ah kan ter. Cun kan dam taktak le dam taktak lo check tthan dingah a sin rakrat tthan te ding zong bia a kan cah tawn.

Jesuh Khrih cu a thiam bikmi Doctor a si bantukin a kan thlop kho taktak tu zong a si. Kan cungah sual palhnak a tuah mi hna kan ngaihthiam khawh lomi, kan chung lei in kan zawtnak hna kha Jesuh sinah kal pi hna u sihlaw a sin ah i thlop hna u sih. Thlarau lei in kan zawtnak hmape vialte hna zong a tlauter kho tu cu amah lawng a si.

Jesuh nih a kan cawnpiak mi thlacamnak: “Mi nih kan cungah an sual tikah kan ngaihthiam hna bangin kan sualnak zong kan ngaithiam ve tuah”(Matt 6:12) timi kha philh hna hlah u sih. Pathian nih kan sualnak a kan ngaihthiam bangin kan cungah sual palhnak a tuah mi hna kan ngaihthiam ve hna a si ah cun Pathian a lawmhter tu Khrihfa taktak, Pathian fa taktak kan si ko hna lai.