Ngaihthiamnak

Nikhat cu zum lo tu pakhat nih Khrihfa pakhat kha: “Hi khuapi chungah hngerhte pakhat Mary a si mi bantuk nu pakhat chungin a chuak in ti ning law na ka zum lai maw?” tiah a ti. Khrihfa pa nih a leh ve mi cu, “Mah hngerhte cu Jesuh bantukin a si ah cun kan zumh ko lai,” tiah a ti.

Mithiang Luke nih a tialmi thawngthabia hi kan zoh tikah Jesuh nih minung hna kan sualnak in a kan ngaihthiam nak le Pathian zangfahnak kong hna hi a hleiceh in a phuan. Zeitluk hmanh in a sual mi minung si ko hna hmanh u sih law sual ngaihchihnak lungthin tak he Pathian sin kan kir than a si ah cun Pathian nih a zangfahnak he a kan don zungzal nak kong hna kha tampi in a phuan.

Farasi a si mi Simon kha zoh hmanh hna u sih (Luke 7:36-50). Judah phunglam le Farasi mi hna zulh phung a zul mi pakhat a si. Cun upat awk tlak mi Farasi pakhat zong a si. Jesuh Khrih kha a inn ah rawl-ei a kawh lio caan ah khua chungin a sual mi nu tiin theih mi minu pakhat a inn chungah cun a rak lut ve i Jesuh ke a mitthli in a tawl piak, zihmui chiti hmangin a sam in a ke a hnawh piak lio ah minung sining in Jesih Khrih kha a lungchung in sual a rak puh sual. Sihmanhsehlaw Jesuh nih Pathian thatnak le zangfahnak kha fiang tein a rak hmuh sak khah.

Ngaihthiamnak a ngei lomi nunphung aa nunpi mi hna cu a thimi nunphung aa nunpi bang an si. Lehrulh duhnak lungthin he lawng a nung mi hna cu Jesuh Khrih cawnpiak mi phunglam he aa ralchan in a nung mi hna an si. Khrihfa sinak a hrampi cu Jesuh bangin kan si nak hnga ding caah a si. Jesuh nih kan sualnak in ngaihthiam kan si thannak hnga ding caah amah le amah kha Pa Pathian sinah aa pekchanh bantukin kan nih hna zong nih kan cung i sual palhnak a ngei bal mi hna kha kan ngaihthiam ve hna awk a si.

Sual ngaihthiamnak kong kan ruah tik le kan chim caan paoh ah JESUH KHRIH kha ka zoh hmasat zungzal awk a si. Midang cungah sual ngaihthiamnak lungthin he a nung kho zungzal mi Khrihfa tha nunzia in nun khawh i zuam zungzal hna u sih.