Ngeih le ngeihlo

Thluachuah he a khat mi caan ttha ser hna u sih.

Tangka le chawva konglam he pehtlai in kan zoh tikah a hohmanhnih “ka ngeilo” “a um lo” timi bia hi theih a duh mi kan um hna lai lo tiah ka ruah. Cu bantuk si ding zong a hohmanh nih kan duh fawn lai lo. Sihmahsehlaw, zawtnak konglam he pehtlai in “ka ngeilo” “a um lo” “negative a si” timi thawngpang cu a ho paoh nih theih kan duh cio mi a rak si tthan.  Pil-kalh in a si mi cafang hna kan zohtikah minung hna kan nunnak ah kapkhat lei cun thluachuah bia a si bantukin kapkhat lei cun chiat nak lei a si kan hmuh khawh.

Tu lio Covid-19 zawtnak hrik he pehtlai in kan zoh tthan a si ah cun “ka ngei lo” “a um lo”, “negative a si” timi bia hi a ho paoh nih theih kan duh cio mi thluachuah bia bantuk a si. Zinglei kan thawh in zanlei tiangah thawngpang kan zoh hna, kan ngai hna i minung pa zeizat dah  “negative” an si cang, an dam tthan cang timi thawngpang lawng hi theih kan duh cio mi a si. Minung pa zeizat “positive” an si tthan cang timi thawngpang kan theih cun thlalau in kan um cio hna i lung daihnak a um lo.

“Nan nih kha zapi lakah siseh, nan inn cio ah siseh, phung kan chimh hna i kan cawnpiak hna tikah nan ca i a ttha dingmi kha zeihmah ka nganhtakmi a um lo ti kha nan hngalh” ( Act 20: 20) tiah mithiang Paul nih zumtu hna sinah a ti hna.

Pathian bia cu a si ning in cawnpiak loin mah duhnak lawng lak raing mang in media platform cungah kan cawnpiak hna a si ah cun Bawipa sal ttha kan si lai lo. Kan Bible cathiang chungah ttial a si mi, cathiang tiah kan zumh i kan pom kan zulh mi hna chung zongah hin mah duh mi lawng lak riangmang in a sawh duhtak nak kan thuh, kan chim lo a si ah cun Bawipa bia a cawnpiak tu siding ah aa tlak lo mi kan si ko lai.  

Covid-19 zawtnak ruangah vawlei cung ram uk bawi hna nih a si khawh chungin ram mi hna sinah himnak le ngandam nak an hmuh khawh cio nak hnga ding caah thawngpang theihter nak zong a tu le a tu an tuah. Cun ram khat le ram khat zong an i bawm hna i covid-19 zawtnak hrik an doh cio hna. Hi hi tak-sa lei ngandam nak caah a si.

Thlarau lei in ngandam nak kan ngeih khawh cio nak hnga ding caah bupi hruaitu tampi hna zong nih Bawipa bia in pakhat le pakhat i hnemhnak an tuah, thazang an i pe hna i thla an cam tti hna. Pathian riantuan tu hna nih thlarau lei kap hruaitu kan si bantukin thlarau a ngandam nak hnga ding caah, thlarau a nun nak hnga ding caah Bawipa cawnpiak ning in kan chim kan rel a herh. Mithiang Paul nih cun “nan caah a ttha dingmi kha zeihmah ka nganhtak mi a um lo” (Act 20:20) tiah a ti bantukin nifatin kan nunnak ah, kan i cawnpiak hna nak ah hin Bawipa duh ning tein i cawnpiak hna u sih, thazang i pe hna u sih law i hnem hna u sih.

Add new comment

7 + 0 =