NU LE PA PUAI NI

Phungthlukbia; 19:26 “A Pa kha a vel i a Nu kha a dawi mi cu, ningzahnak a chuahtertu le hmaichiatnak a phurtu a si.”

          Kokek ningkel in khuacaan cu a hung i thleng i ruahtam nawn a sur caan a si mi July thla zong kan phan `han cang. Catholic Khrihfa nih 26 July hi “Nu le Pa upat Puai Ni” siseh tiah ri a khiah. Nu le Pa hi thluachuah nganbik panga lakah aa tel mi an si caah Fale hna nih upat awk hrimhrim an si. Nu le Pa timi ahhin, hringtu nu le pa, ngak`ah buangro cawmkengtu nu le pa, fimnak cawnpiaktu Saya/mah te, Thlarau lei lamhruaitu Bishop in Tlangbawi le Damah Saya/mah, Pastor te zong hi ka zawn ah hin telhchih dih a si.

          Zeicah nu le pa hi upat an herh ti ahcun nu le pa an um ruangah fale hi um a si i minung kan sinak hi a si caah a si. Nu le pa cu hmaisuang saya an si. Kan semka in mitling (puitling) kan sitiang thlan hripi pawt in le him tein a kan zohkhenhtu an si. Salm 126:3 ah “Fale hi Bawipa sinin kan hmuh mi ro an si; Thluachuah a kan pek mi an si,” ti mi kha kan tlaitleng ah i chiah in, anmah duh mi an nunnak nakin fale duh mi papek le nunnak thap in ruahti zong zuamcawh, khuasik zong ing, khualinh zeirel lo hnuchit in an ttuan an kawl. Zeitluk in thabat zaangba, sifah lungretheih ko hmanh hna seh, fale mirhnak an ton tikah cun Thlapa ceu nih cerhmi baahnah bang an thar`han zungzal kho. Fale kha thladem bangin an zohthla hna i fale an i nuamh lawngah an i lunghmuih. Nu le pa cu fale caah Victoria tlang bantuk an si. Konglam tampi ruangah fale cu mi hrawkhrol mi`halo ah an i chuah sual tikah cun, an mithmai cu mi bupi hmai ah kokek ral ruang i a cimmi Runtlang bantuk an si tawn. Nain, zeitluk in, zeibantuk tiang in an sual an palh zongah ngaihthiam zungzal khotu an si.

          Nu le Pa cu fale caah Nika le Thlapa pahnih i bawm in an ceu bantuk khi a si. Nu nih Thlapa bang zaangfah dawtnak puan he tuam (khuhchilh) i Pa nih Kaamlo Niceu bang thazaang a chap piak. Nu cu thlaikho belh phoih piaktu a si i Pa cu a kung tthawnnak le a tthantertu nonttha bik a si. Kan ngakchiat tein nihin tiangah fimchimtu, Pathian theihtertu, chiattha thleidannak hngalhtertu le cawnpiaktu an si.

          Cu ve bangin hi leicung, caan saupi muihnak chungin ceunak lei lanhkhawh dingah phungbia thiang hna, chimh hrinnak hna le fale nih lam kan tlaunak hnga lo a kan cawnpiaktu hna an rosung zong khi a thuktuk hringhran ve. Kut zungthiam pa nih sobul den nakin innttha inn dawh a chuak. Umser pa nawncek nalhnak in um tthattha an chuak. Rili meiceu nih lam a hmuhsaknak thawngin Tilawng hna him tein an kawltung an panh kho. Dum ngeitu zohkhenhnak thawngin par phuntling an eng kho. Cu bantukin Nu le Pa le (nu le pa a si mi hna) mei vannak le lam hmuhsak hruainak thawngin fale (Khrihfa) hna zong fiang tein a ceu mi meiliu bantuk kan si ve. Cucaah kan Bishop, Tlangbawi, Pastor te ... etc. cu hi vawlei ah Pangpar cingtu kut le ceunak petu hrampi an si.

          Kan Bawipa nih nu le pa le rosung petu hna nawlngeih awk a kan fial mi cu, Phungthlukbia; 6:20 “Ka fapa na pa nawlbia kha ngai hna law, na nu cawnpiaknak kha hlaw hna hlah” a kan ti. Cucaah “Thluachuah Rosung” a si mi Nu le Pa kha a tanglei bangin upat ka pek hna;

Thluachuah Rosung Nu le Pa upat peknak Roca

Exodus 20:12 “Bawipa Pathian nih an pek mi hna ram ah saupi na nunnak hnga, na nu le na pa upat hna”

          Khuacaan helkhat, furcaan a hung chuak tthan cang. Vawlei pumpi, zeihmanh langhlo, chum ni khuh dih..., nitlak thlanglei mohtun thlithawnnak nih, chum le dapti khawmh in, ruahti dai vawlei hnamhter, van kaupi khin, lunglawmh tha nuam in, ruahti fitlaw utlak dangte hna i an hla oih thawng ngaih a nuamh zia, cu hla dawh hna he nang zong dawh, kei zong dawh, lungtling tein, pengkulh hmui mi hninsi (Rose) par rim, ruahti ah hmaipanh tein khua caan rel pangpar hna, phungtling an eng, mitthlam cuanter in hmuh khawh mi thil pakhatte cu, donglo chungtel rosung petu nu le pa hna kha tangdor tein upat peknak “Nu le Pa Puai Ni” a si ko lo mei? Upat awktlk Bishop, Siangbawi, Sister, Damah Saya/mah (Pastor) te le nu le pa hna upat peknak cu “Nawlbia pahra chung i a pilnak kha zulh le tuahnak” a si.

          Aw... ruahti dor tete tampi in catlo a thletnak July thla “Nu le Pa Puai Ni” kan phak caan paoh ahhin innhlum fale si hnaseh, nunnak caah fakpi zuam in ramleng panh fale si hnaseh, nu le pa kha hlam tawn hna mu! nu le pa thladem, dawtnak muru nih khuhchilh, tthalcaan ah daihter, furcaan ah humhim piak, khuasik ral lumter zungzal, fale caah cun ralttha deuhdeuh, rap phunkip lakin khamh piak le ttanhpi hna Sayate, hlennak phuntling nunnak “Ni” ah, theihnak thluak in ruat le tuah, mah lung duhnak kaltakin, chungkhar ca papek pum le rilca, fimnak ca tiin, hi phunthum hna caah thlanhripi pawt in nan ttuanhawl hna maw... (nu le pa)

          Khat le khat theih thiamnak in chungkhar vawlei, thinlung a dai, Piasen tangka pek le laak zong ngah lo, duhdawtnak le siannak hna in hmuh khawh mi saduhthah innte, hmunh ding zuam i sak, an lamthluan ah, fanu fapa, mithmaite kha, chiatkhat hmuh zawn ah, nitlan tik i dapti cu ti khu ah a cang/tlau bantukin, an thabatnak le sifah innak vialte cu lamhlatpi tiang hlonh bang an tlau tthan, an i zuam i chankhat lunglawmhnak le hmailei chan a nuam i nunnak biazai thlum dingah, kut pahnih thazaang pomchuah in, duh ningin dan, muisam tharchuah awk ah, nan nunnak cu fale caah nan hman, ... ( nu le pa aw...)

          Cucaah cun nu le pa cu fale caah, zungzal in cawm dingah, nan harnak le nan herhbaunak vialte ttuanpiak dingin, nan rothil co awk caah nan bia ngaih ding le thlanmual nan liam kilven dingah kan i zuam lai, tiah biaren kan `em fale hna nih...

* Nilin ko seh ka in lai, ruahsur ko seh kaa cinter lai, tiah lung i thlek in fale hna caah humhimnak a pe khotu bik nu le pa...

* Pangpar dawhte pakhat hmuh ding in kut ah hlingchunh, thichuahter in a kan cawnghramtu Dum cawngtu patling si mi  (Bishop...) kan pa...

* Voihra lethra palh sual zongah, lethra voihra ngaihthiamnak lungthin tthabik a ngeitu nu le pa nan si...

          Cu a si caah kan rak i sem ka khan nu le pa, caan khatte hmanh a daibal lo, a luang camcin nan dawtnak, Hmanhseh dih sual lai ding kan phang lo, kan hnangam ko, nu le pa aw, Hawi hmuh a hmu kho kan si lo hmanh ah, Hawi ngei a ngeih kho kan si lo hmanh ah, nunu papa biafang, nan “hawih” chung paoh cu, kan caah a tthabik a um kan hngalh..., Nan tlei lai ni ruat kan duh lo, nan kan liamtak ding kan ruat ngam lo, sikhawh cun nunu le papa, kum thong chanza tiang `hen tilo in kan nunpi hram u law... tiah saduh thah he...

          “Kan Pa Bishop le tlangbawi, Sister, Damah Saya/mah vialte nan dihlak, nan ngan dam in nan chanza tlung ko seh!”

          “Pupu Pipi, Papa le Nunu, nan zapi zong nunkhua sau in nan ngan dam cio ko seh!”... tiah thlaza campiak bu in...

>>>

Fale rual hna

Catholic Khrihfa bu

Hakha