A nungmi zumhnak ngeih a herh

Jesuh nih cun, “Hihi va philh hlah u: Anttam ci tiahte hmanh zumhnak nan ngeih ahcun, hi tlang hi, ‘I thawn,’ ti u law aa thawn ko lai. Zei paohpaoh kha nan tuah khawh ko lai”. (Matt 17:20)

Jesuh nih zultu 12 hna a thlah hna i “Vancung Pennak kong” thawngttha a phuanter hna tikah zultu hna zong nih Bawipa pek mi thil ti khawhnak in mizaw an damter khawh hna, khuachia zong an tthawl khawh hna(Lk 9:1-2). Zultu hna cu an i thawh i khua kip kha an tlawng i hmun kip ah Thawngttha kha an chim i a zawmi kha an damter hna(Lk 9:6). Cu hnu ah a dang zultu 72 hna zong kha a hlaan bang khan a thlah tthan hna i zultu hna an rak kir tikah “Bawipa nangmah min in kan tthawl hna tikah khuachia hmanh nih kan nawl an ngaih” (Lk 10:17)tiah an ti.Cu ruangah ngakchia pa a pa nih hin an sin ah a kal i a fapa damter awk ah bawmhnak a rak hal hna nak hi a si.

Sihmanhsehlaw, nihin thawngttha bia (Matt 17:14-20)chung kan theih mi sining ah “Bawipa, na zultu pawl sinah ka ratpi nain an damter kho lo”(16) tiah a ti. Zultu hna nih damnak an pek khawh lo nak hi zei ruangah dah a si hnga? Cu ruangah Bawipa nih an ttamci tia zumhnak kong in a cawnpiak hna nak hi a si. Hi zawnah zumhnak a hmet le a ngan kha chim duhmi si loin, an zumhnak hi a nung mi zumhnak a si maw? timi tu hi a si deuh. A nung mi zumhnak a si ah cun anttamci tia hmanh sisehlaw a tthang kho mi a si caah a si.

A hramthawh thlah an rak si lio ah cun zultu hna nih an mah thil ti khawhnak cungah bochannak ngeih loin Bawipa thil ti khawhnak cungah an zumh caah khuaruahharnak thil tampi an rak tuah khawh taktak. Sihmahsehlaw zultu hna nih an minung sining in khuaruahhar thil an hun tuah khawh tikah siseh, zeitin dah tuah ning cang a si timi an hun hngalh tikah siseh, Bawipa cungah bochannak an rak ngeih mi kha a zor i, an mah minung sining in thil ti khawh nak cung tu ah i bochannak (Keimah timi lungput) a um caah teinak an hmuh khawh ti lo hi a si.

Zultu hna nih an rak palh bang khan kan nih hna zong nih kan palh ve lo ding hi a herh ngai mi a si.

1. Pathian thil ti khawhnak le tthawnnak cungah zumhnak ngeih ding.
2. kan chungah tlang tampi an um timi theih ding.
3. thil a ti kho taktak mi cu Pathian lawnglawng hi a si tiin cohlaan ding.
4. Khuaruahhar nak tuah lawng hi kan rian a si lo; thlarau khamh a si ding tu hi a biapi mi a si.
5. Pathian cungah kan zeizong vialte kan ap dih a si ah cun khuaruahhar thil pakhat khat a cang zungzal kho lai.

A kan dawntu tlang hna kha nuam tein thawn cio hna u sih.