Nunnak Changreu cu Keimah hi ka si(Jn 6:35)

Zarhkel (18) nak Zarhpi ni ah kan rel mi cathiang hna cu (Exo 16:2-4,12-15; Eph 4:17,20-24; John 6:24-35) hi an si. Nihin cathiang hna chung in Bupi nih a kan cawnpiak duh mi cu “Jesuh Khrih nih Nunnak changreu cu keimah hi ka si” tiah a ti mi Jesuh nih “changreu, rawl” he amah le amah aa tanhchunhnak kong, cu changreu-rawl cu zumhnak he kan cohlaan nak hnga ding kong a si.

Vokhatnak Bible kan relmi ah Israel mi hna cu Bawipa nih Egypt ram in a sal Moses hmang in a chuah hna i Abraham sinah bia aa kamh mi Canaan ram lei kal ding in a fial hna tikah an khual tlawnnak lamthluanpi ah an zainak le Pathian le a sal Moses cungah zumhnak an ngeih khawh tak lo nak kong a si. Thetse ramcar chungah khual an tlawn caah harsatnak tampi an ton, sihmanhsehlaw Pathian nih a fialmi hna ram lei panh in a kal mi an si caah Pathian nih zeitik hmanh ah a philh bal hna lo; a zohkhenh zungzal hna nak kong a si. An paw cu a ttam taktak ko, sihmahsehlaw Pathian bia ning in a kal mi an si caah eiawk a pek ko hna. An ti cu a haal taktak ko, sihmanhsehlaw Pathian nih din awk ti cu a pek taktak ko hna.

Jesuh nih mi thong nga rawl a pek hna nak kong (Jn 6:1-15) chungah kan hmuh. Zeiruangah dah mah tluk tam mi mipi hi rawl a dangh hna hnga tiah ruah ding zong a um ngai. Kan theih hnga ding mi cu; mipi nih hin Jesuh cawnpiak nak kha an duhnak nganbik ah an chiah khawh caah a si. Pathian duhnak kan tuah a si ah cun kan duh kan herh mi hna zong kha Pathian nih kan hal hlaan in a kan tuah piak ve ko lai. “Cucaah zei dang vialte nakin Pathain Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek tthiamthiam ko hna lai”(Matt 6:33).

Sihmanhsehlaw, nihin thawngttha bia kan rel mi kan zoh tthan tikah rawl a rak dangh mi hna lungthin chungah ruahnak ttha lo he Jesuh an kawl nak kong a si. Pathian duhnak le cawnpiak nak hna kha theih duh ah si ti loin, an mah duhnak kha Jesuh nih kan tuah piak seh timi lungput he Jesuh an kawl caah Jesuh nih a mawh chiat hna.

Nifatin kan nunnak ah Pathian duhnak a zulmi le a tuah mi maw kan si (or) kan duhnak lawng te kha Pathian nih kan tuah piak seh tiah a duh mi maw kan si? Ruat cio hna u sih. Pathian duhnak kan tuah a si ah cun kan herh mi vialte a kan pek ko lai.

“Pathian nih tuah hna seh ti an duhmi hna rian cu hihi a si: a thlahmi zumh hi”(Jn 6:29).

“Nunnak changreu cu keimah hi ka si. Ka sin i a rami cu ahohmanh an rawl a ttam lai lo i keimah a ka zummi cu ahohmanh an ti a hal lai lo”(Jn 6:35).