Nunning 

Na chungkhar hna caah siseh, na um ṭimi na hawi le hna caah siseh nangmah le nangmah hruaitu ṭha ka si tiah nai ti kho maw? Ka chim ning in thil ka tuah ko tiah nai ti kho maw?

Nihin ni caah Bupi nih a kan thimpiak mi cathiang Luke 11: 42-46 chungah Farasi mi hna le phungbia cawnpiaktu saya hna kha Jesuh nih sual a phawt hna nak kong kan hmuh. Zei ruangah dah a si hnga tiin bia hal nak um sehlaw Farasi mi hna le phungbia cawnpiaktu saya hna nih hin “a parpavuan lawngin le leng lei hmuhnak lawngin an nun caah a si” tiin leh a si ko lai. An zumhmi phunglam hna kha midang hna sinah an cawnpiak hna ning in an nun lo caah a si. Cun Farasi mi hna cu an phu chungah hruaitu an si bangin an hruaimi hna caah an chim, an phuan, an cawnpiak hna ning in an nung lai timi zong an hruai mi hna nih an ruah caah a si.

Hruaitu ṭha hna cu midang hna nih an tuahser mi thil hna le an nun lam hruai ning hna an hmuh hna lo hmanh ah nun zia dawh tein a nung zungzal mi an si. An chim, an phuan ningin a nung mi an si. Ahohmanh nih thil an tuah mi hmu hmanh hna hlah sehlaw thil dik, thil ṭha an tuah mi kha an ngol bal lo. An hruaimi hna an cawnpiak hna ning in khan anmah hrimhrim zong an nung ve. An nun ning hrimhrim in bia a chimmi an si. 

Jesuh Khrih cu kan hruaitu ṭha bik a si zungzal ko. A zeizong vialte kan ca ṭhatnak a chuah nak hnga ding caah aa pe siangtu zong a si fawn. Taksa lei in zeitin dah nunzia dawh in kan nun ding a si timi lawng cawnpiak loin zeitin dah kan thlarau zong khamh a si lai timi tiang in a kan cawnpiaktu a si. 

Kan nih hna zong Farasi mi hna bantukin kan nun caan a um men lai. Kha lio caan te ah khan Jesuh Khrih kha philh hna hlah u sih. Minung kan sic aah Pathian duh ning in kan nung zungzal kho men hna lai lo. Sihmanhsehlaw Jesuh Khrih Pathian duh ning bangin kan nun caan a um lio caan zong a um ko lai. Mah bantuk nunzia dawh te kha pehzulh in nun khawh i zuam zungzal hna u sih. Midang mit-hmuh ah nun dawh in a nung mi lawng siloin ahohmanh nih hmuh lo caan le a thli tein kan nun caan tiangin nunzia dawh in nun khawh i zuam zungzal hna u sih. Pathian sinah kan herhbik mi thluachuah hna zong hal hna u sih.