Nunphuannak (tehte khaan)

Pathian thil tuah ning programme hna hi minung khuaruah ning le tuaktannak nih a theih khawh lo mi khuaruahhar “mystery” an si.

Pathian nih minung hna kan sual-palhnak in khamh kan si nak hnga ding le zungzal nunnak kan hmuh tthan nak hnga ding caah thil a kan timhpiak mi hna hi kan ruah, kan zoh tikah duhsah tein le a dotdot in timh tuah a si kan hmuh khawh. Abrahman chan ah Canan ramdawh pek dingah biakamh a rak si bangin, kan Bawipa Jesuh Khrih a rat tikah cun Vancung ram nuam co dingah biakamh kan si ve.

Pathian nih minung hna he biakamnak a tuah tikah minung lei in cuarpar tannak in biakam fehter nak rak tuah a si. Sihmanhsehlaw, Jesuh Khrih a rat tikah cun sual ngaihchihnak tuah in nu he pa he tipil in nak thawngin biakam fehternak tuah a hung si. Cuarpar tannak tuah ti loin, lungthin thleh “sual ngaihchihnak tuah” in Pathian sin ah i mer tthan a si cang.

Nihin kan theih mi thawngtha bia (Matt 8:1-4) chungah Bawipa nih thinghmui zawtnak a ngei mi pa a damter tthan nak kong kan hmuh. Sualnak kan tuah paoh ah hin kan thlarau hi thinghmui zawtnak bangin fih a nung i a thianghlim mi hna nih co duh lomi sining ah kan phanhter leng mang tawn. Bawipa nih thinghmui pa kha a kut in a tongh i a damter tthan bangin kan nih pakhat cio zong Bawipa nih a dawtnak in a kan tongh i damter mi hna kan si.

Thinghmui zawtnak in damter a si tthan mi pa cu Bawipa nih Moses phungbia bangin tlangbawi sinah thianter a si tthan cang nak kha tehte langhter dingah a kal ter bangin, thinghmui zawtnak he aa lo mi kan thlarau thihnak tiang a phanhter tu sualnak chungin damter kan si tikah mikip sinah Bawipa dawtnak kha tehte khaan ding kan si ve. Bawinu Mary nih : “An chimhmi hna paoh kha tuah te u”(Jn 2:5) tiah pakhat cio a kan ti bangin Bawipa cawnpiak mi le nawlbia hna kha zulh zungzal ding kan si.