PA SINAH KALNAK LAM JESUH

PA SINAH KALNAK LAM JESUH

Johan 14:1-4 “Khuaruahhar lungrethei in um hlah u. Pathian kha zum u law, keimah zong kha ka zum ve u, ...cun ka umnak ah nannih zong nan um lai,...” tiah a ti hna.

BUBULUK TUANBIA: Voikhat lio ah utlak nu cu tidil ki ramsang kung hna karlak ah a ti a tit. A caan a phanh tikah ti buanbara chungin Bubuluk fate hna an rak keo i tidil chunglei ah an rak chuak. Tidil cu an i nuamhnak hmun ah an ruah i lungbangbuar ei in an i nuam. Utlak nu nih cun a zohkhenh hna i: “ramsang kungtang tichung lawng ahhin nan um lai” tiah a ti hna.

“Lenglei ah khin mi sa ei hmang Ngaramh nganpi a um. An ei hna lai” tiah Utlak nu nih cun ralrin a pek hna. “Zeica’h na bia kan in ngaih lai” tiah Bubuluk fate hna nih an hal. “Keimah hi nan nu pei ka si cu! nan nun khawhnak hnga caah ralrin kan pek hna” tiah a leh hna. Asinain Bubuluk a cheu nih an ngai duh lo.

“Mah nu hi kan nu a si kho lo; Kutke a ngei. Kannih kan ngei lo. Nga he kan i lo” tiah pakhat le pakhat an i ceih. Utlak nu nih: “Keimah hi hringtu nan nu bak ka si. Kei-mah he i lawh dingah pei kan hrin hna cu; hi hmun hi a zungzal nan umnak ding a si lo. Hi rawl zong hi zungzal nan ei ding mi rawl a si lo. Himnak a tthat deuhnak hmun le hi nak tha deuh rawl zong a um. Zalong tein nan i hlawh khamhnak hmun le nunnak caah thlitha dawp khawhnak hmun zong nan hmuh te lai. Kannih cu Utlak phun kan si lo. Nga phun kan si ko. Nga hna sinah pei kan kal te ko lai” an ti i, an nu bia ngaih duh lo in tidil kauhdeuhnak lei ah an chuak. Ngaramh nganpi nih cun a hlen hna i a auh hna. “Kei hi nan nu pei ka si, cu ei awk rawl tampi a umnak ah kal nan duh ahcun rak ka zul uh” tiah a hlan i a kalpi hna. Bubuluk cheukhat nih an nu taktak ah an ruah i an zulh.

Utlak nu nih a tahpah in a chimh hna. “Ka fale hna nan-mah hi Utlak a cang hnga mi Utlak cheuchum, nga cheuchum nan si. Nga taktak nan si lo, a hnu zul hlah u; nan thi lai” tiah a mithli he a ti hna nain a bia ngaih duh loin an zulh. Ramsang kung umnak in lamhlat nawn an phak tikah Ngaramh pi nih cun pakhat hnu pakhat in a rak ei hna. Cheukhat Bubuluk hna tu cu an nu bia an ngaih i an tawn caah an luat. Cuticun, nikhat cu Utlak nu nih a chimh hna: “Nan nu hi diltlang (vawlei) ah a ka kai cang lai. Nan caah hmun ka va remh lai; rak ka zul ve te u mu!” a ti hna tikah Bubuluk fate hna nih, ‚Diltlang (vawlei) timi cu kan hmu bal lo. A phanh zong kan phan bal lo; Nangmah nu bangin kutke zong kan ngei lo i zeitindah kan kal khawh lai,‛ tiah an leh.

Cu tik ah Utlak nu nih: “Nannih zong nikhat pum tling mi nan si tikah nan rak phan ve te ko lai. Cu tikah kan i tong te hna lai mu” tiah a ti hna i tidil cun a pehtak hna. A ter ahcun Bubuluk pawl cu an ngaih a chia. Cheukhat nih kan nu chim mi diltang (vawlei) timi hi a um taktak hnga maw tiin lung aw ttomnak an um nain cheukhat nih cun kannih hi nga kan si lo, Utlak kan si ko ti kha an i zum kho dih lo. Kannih hi ‘Mei’ kan ngei” an ti. Tichung an phak zarh 4 a ruah tikah nga bantuk ngaphe (paheh) le ha hna an rak kho.