Pahnih pahnih In a Thlah Hna

"A zultu pahleihnih kha hmunkhat ah a kawh hnga i pahnih pahnih in a thlah hna."(Mark 6:7)

Jesuh Khrih nih a zultu hna a thlah hna tikah thawngthabia phuan ding, Pathian bia cawnpiak ding le a dam lomi hna damnak pek awkah a si. Jesuh Khrih nih a zultu hna a thlah ning hna hi kan zoh tikah managemant a tuah ning hi a tha tuk hringhran.

Pahnih pahnih in a thlah hna. Zeicah tiah cun pakhat le pakhat i bawmh ding le harsatnak ton tik caan ah thazang i pek ding caah a si. Hitin a thlah hna ning zongah hin zultu hna nih an riantuannak ah hma kal deuh seh, ngamhsang ngai in an chimmi thawngthabia hmual zong ngei deuh seh tiah a si.

Jesuh nih bia a cah mi hna cu "Nan khualtlawnnak dingah hin, thiangthunh dah ti lo cu zeihmanh i ken hlah u; riahcaw siseh, zal siseh i phorh hlah u, nan angki zal ah phaisa zong i sanh hlah u. Phanah i danh u law angki a khethuan i hruk hlah u" tiah a ti hna.

A sullam cu zultu hna nih an mah ngeih mi chawva cungah i rinh lo ding le ruamkai nak ngeih lo ding a si. Chawva cungah thinlung umter loin Pathian thawngthabia phuannak lawngah an lungthin dihlak in an chiah khawh nak hnga ding caah a si.

Zultu hna nih Jesuh chimmi bangin thawngthabia an phuan tikah khuaruahhar thil tampi an tuah khawh hna. Thlarau thalo kha an thawl khawh hna i a zaw, a dam lomi hna kha damnak an pek khawh hna. Jesuh nih a thimmi zultu hna hi thiamsannak catang a ngeimi zong an si hna lo. An ram an miphun hna chungin upat awk tlakmi hruaitu hna zong an si hna lo. Nang le kei bantukin a nung kal mi mi sawhsawh an si ko hna. Sihmanhsehlaw Jesuh nih, Pathian nih nawl a pek tikah, nawl pek an sining in felfai tein an zulh an tuan tikah taksa lei in siseh, thlarau lei in siseh midang hna caah thatnak tampi a chuahpi tu hna an si.

Nihin ni caan zongah Jesuh Khrih nih nang le kei zong a thawngthabia phuan ding le cawnpiak dingin a kan auh ve. Pathian nih a kan dawtnak, kan zawn a kan ruahpiak nak thawngthabia kha midang hna nih an theih an hngalh i an cohlaan khawh nak hnga ding caah a kan auh ve.

Kan caan siseh, kan theih hngalh mi Pathian thawngthabia hna kha a kan dawtu Pathian sunpar lianngannak caah hmang ve hna u sih.