Pakatnak a Hmumi Nu

Ni nih a kan ceuhnak lei kap kan hoih a si ah cun kan thlapale cu kan hnu lei ah a um ko. Vawlei ceunak a si mi Jesuh Khrih leikap kan hoih a si ah cun kan thazang dernak (sualpalhnak) hna cu hnu lei ah an tang ko lai.

Nihin July 22, 2021 ni hi Bupi nih mithiang Mary Magdalene puai ni a si tiah cawnglawmhnak puai a kan tuah piak. Mary Magdalene zong hi hlaan a rak nunnak ah cun muihnak (thlarau tthalo) nih a rak khuh cikcek minu a rak si ko nain ceunak a si mi Jesuh Khrih lei hoih in a panh tikah cun ngaihthiamnak le thian ternak a hmu mi nu a rak si. Mary Magdalene hi Jesuh nih thlarau tthalo pasarih a chuak piak mi nu a si tiin Luke nih a langhter mi nu a si(Lk 8:2). Pasarih timi number hi “a tling mi” a si ti nak a sawh duhmi number a si bantukin,  Mary Magdalene hi nunzia leikap in dawh cah lonak(moral) tthat lo nak lei in si loin thlarua tthalo nih tling cikcek in a rak uk dih mi nu a si ti duh nak a si. Mah tluk thazang dernak he a khat mi nu a si ko nain zei ruangah dah thihnak in a tho tthan mi Jesuh Khrih kha a hmu hmasa bik mi a si khawh hnga timi zong hi khuaruahhar ngai mi thil a si fawn.

Jesuh nih “a thi le sa” ei awk ah kan pek hna lai tiah a chim lio caan ah zultu tampi nih a lung a hmaan ti lo tiah an ruah i an kal tak dih ko nain(Jn 6:66)  Mary Magdalene tu nih cun a dongh tiangin Jesuh hnu kha a rak zulh(Jn 19:25; Matt 27:61). Zarhpi zing khuadei kate ah Jesuh an vuinak thlaan lei a kal ngam mi hrimhrim nih hin zeitluk in dah Jesuh cungah dawtnak a ngeih timi zong hi fiang tein a langhter khawh rih(Matt28:1) . Peter le John nih Jesuh ruak an hmuh lo tikah thlaan in an kir cang ko nain Mary tu nih cun a kawl peng ko rih: “Bawipa, nangmah nih na lak a si ahcun na chiahnak kha ka chim tuah, ka va kal lai i ka va lak lai” tiah a ti(Jn 20:). Dawtnak lungthin tak tein Jesuh kha a kawl caah thihnak in a tho tthan mi Jesuh a hmuh hmasabik tu cu Mary Magdalene kha a rak si.

Kan nih hna zong zeitluk in a sual a palhmi rak si ko hna hmanh u sihlaw “Dawtnak” lungthin tak tein Jesuh Khrih kan kawl i Amah lei kan hoih a si ah cun Mary Magdalene bangin kan biak kan hmuh ve hrimhrim ko hna lai.