Pakhat le pakhat thlacam I bomh

Nihin kan relmi avoi(1)nak cathiang (Acts 20:28-38)kan zoh tikah, mithiang Paul nih Ephesus khua mi hna a chonh hna nak kong kha kan hmuh. Hi a chawnhbiak hna nak chung zongah hin Paul lungput le rian a rak ttuan ning cang hna kha kan hmun khawh. Ephesus khua mi hna sinah thawngttha bia a rak chim lio zongah mitthli he biatak in a rak cawnpiak hna timi zong hi hmuh khawh a si. Nikhat, zarhkhat, thlakhat lawng hmanh siloin kum(3) chung a rak cawnpiak mi hna zong an si.

“Riantuantu cu a ttuan man a hmuh awk a si”(Lk 10:7, 1 Tim 5:18) tiah Bawipa nih a rak chim ko. Sihmanhsehlaw, Paul nih cun a cawnpiak mi Khrihfa hna sin in bawmhnak le thilri chawva hna cungah ruahchannak ngeih loin, amah kut tein rian a ttuan i a paw aa cawm. Cun a herh a bau mi a hawi le hna zong kha a rak bawmh hna: “Hi ka kutte hin rian ka ttuan i keimah le ka khawile nih kan herhmi vialte kha keimahte nih ka chuahpi ti cu nanmah hrimhrim nih nan hngalh ko”(Acts 20:34). Cun amah bangin a herh a bau mi hna kha bawmh khawh ve ding ah a chim tthan mi cu: “Zeizong vialte ah hi bantukin fak piin riantuannak thawngin a dermi kha kan bawmh hna awk a sit i cu kan hmuhsak cang hna i Bawipa Jesuh zong nih khan zeitindah a rak ti ti ahcun, ‘Pek leiah hin hmuh lei nakin lunglawmhnak a um deuh,’ a rak ti; cucu kan philh lo awk a si” tiah a ti (Acts 20:35).

Amah a um lo tik hnu ah Ephesus khua um Khrihfa hna nih tukforhnak a phunphun an ton te lai ding zong ralrinnak bia a cah ta hna. Cun tukforhnak chung an tlak nak hnga lo ding caah thla zong a campiak hna.

Nihin thawngtha bia kan theih mi (John 17:11-19) chung zongah Bawipa Jesuh nih a zultu hna caah thla a campiak hna nak kong zong kan hmuh. Zultu hna zong nih tukforhnak a phunphun an ton te lai ding kha a chimh cia hna. Nihin kan relmi cathiang hna hi ttha tein kan zok tikah “hruaitu ttha hna lungput le dirhmun” kha fiang tein kan hmuh khawh.

Jesuh hnu zultu kan nih hna zong Bawipa nih lam a kan hmuh sak cang bangin “pakhat le pakhat caah thla i campiak zungzal ding a si.” Tukforhtu kan ral satan cu pakhat thazang lawngin tei khawh ding a har caah a phu in i bawmh i do cio hna u sih.