Pathian auhnak le minung lehnak

Misual ka si, aa tlak lomi ka si ti aa thei aa hngal mi hna kha Pathian nih a rianthiang tuan awkah a auh hna. Kan Bible cathiang chungah Pathian nih a rianthiang tuan awk ah a auhmi hna tampi an um. Minung 3 hna nih an sining cio in Pathian bia an lehnak te kha vun zoh hna u sih law thazang i lak ti hna u sih.

Profet Isaiah nih Pathian auhnak thawng a theih tikah a leh mi cu, “E law, mah hi ka si ko cang! Ka lo ko cang. Ka ka in a chuakmi bia hi bia sual lawngte an si i ka umnak mi zong hi bia sual le bia thur a hmangm lawngte an si. Cung atu ah ka mit hrimhrim in Siangpahrang, Ralkapbu Bawipa cu ka hmuh” tiah a ti(Is 6:5). Profet Isaiah nih Pathaih auhnak a a theih tikah aa tlak lomi sinak kha a langhter.

Mithiang Paul zong Jesuh Khrih nih a thangthabia phuangtu si dingin a thim hnu ah a chim phuanmi cu, “Pathian Khrihfabu kha ka rak hrem hna i cucaah cun lamkaltu vialte hna lakah nauta bik ka si – a ngaingai ti ahcun lamkaltu ti awk hmanh kaa tlak hrimhrim lo. Sihmanhsehlaw Pathian ve thawngin atu i ka sining hi ka si”(1Cor 15:9-10a) tiah a ti.

Simon Peter cu Jesuh nih a auh tikah Peter nih a leh mi cu, “Bawipa, ka kaltak ko, kei cu misual ka si”(Lk 5:8) tiah a ti. Jesuh nih Peter cu, “Na thinphang hlah, atu thawk in mi na tlai cang hna lai”(Lk 5:10) tiah a ti.

Dawtmi u le nau hna Bupi nih a kan serpiakmi calender Zarhkel (5) nak zarhpi ni ah Bupi nih a kan cawnpiak duh mi cu minung cu Pathian hmai ah ahohmanh aa tlak mi kan um lo. Sihmanhsehlaw Pathian nih a thim i rian a fial mi hna paoh cu a vel thluachuah he a umpi zungzal ko hna. Rian a tuan tu tak cu Pathian kha a si timi a si.

Profet Isaiah siseh, Peter siseh, Paul siseh pakhat le pakhat an fimnak le thiamnak aa lo cio lomi an si. An minung sining zeitluk hmanh in i dang cio ko hna hmanh sehlaw an riantuang ning cang le an riantuanmi cu aa lo dih ko. Pathian auhnak an leh ning hna zong aa lo ngaingai hna. Pathian nih a dawt hna ruangah a auh hna; an nih hna zong nih misual kan si, kan i tlak lo timi tangdornak lungthin an ngei cio hna; Pathian nih a rianthiang tuan dingin a auh mi hna kha a cawnpiak hna, a thianter hna i tuanding mi rian khinh an simi cu pumpak rian siloin Pathian hrimhrim nih a fialmi hna rian a si nak kong kha a theihter hna, thazang a pek hna.

Pathian rianthiang cu keimah timi ruam kainak lungput ngeih in tuan khawhmi rian a si lo. Tangdornak lungput he Pathian chimmi bia kha ngaih zungzal in Pathian duh ningin zulh le tuan kha a si. Paul nih a chimmi cu, “A ngaingai ti ahcun keimah nih ka tuan ti awk a si lo, Pathian vel ka chung i rian a tuanmi tuannak tu kha a si deuh”(1Cor 15:10) tiah a ti.