Pathian Bia

Khua pakhat ah inn khat hnu inn khat aa chawk i thulut (Balloon) a zuar mipa pakhat a rak um. Amah cu ‘ka thilri hi zeitindah ka zuar hna lai’ timi zong ṭha tein a hngal mi a si. Cu pa cu aa chawk cuahmah ko i a thilri a zuar pah cun khualai cir dinhnak hmun pakhat ah khin a hei phaan. Cu ka hmun ah cun ngakchia rual hna zong lente an rak i celh cuah mah lio caan te kha a si. Pawngkam a hei zoh i a zal chungin thulut a rangmi pakhat a chuah i thli a tum i van ah a hei thlah. Cu hnu ah a senmi a lak ṭhan i a chem ṭhan i a thlah ṭhan. Cun a engmi pakhat a lak ṭhan i cuti ṭhiamṭhiam cun a tuah ṭhan. Pawngkam a ummi ngakchia pawl nih an hmuh tikah an lung a tuai tuk hna i a thil cawk dingah le zoh dingah an rat hnawh i an buut lulh ko. 

Cu lio te ah cun ngakchia pate pakhat nih cung i a zuang mi thulut hna kha a zoh pah in cun thilzuar tu pa sinah a lung chung i a ummi bia pakhat a hal mi cu: “Ka pu, thulut a rang le a sen na thlah hna i cungah an zuang, a nak mi teh chem law cungah a zuang kho ve lai maw?” tiah a hal. Cu tikah tarpa nih a lehmi cu “Ka fa, thulut a zawng nih a zuanter mi a si lo. A chung i a ummi thli nih a zuanter mi a si,” tiah a ti.  

Kannih hna zong kan chung i a ummi nih hin kan i tinhmi hna cungah teinak a kan hmuhter bantukin, ṭhat lonak kan chungah kan ṭhan ter sual a si ah cun tlaknak zong a chuahter khawh. 

Pathian bia kan chungah a nun i kan ṭhanter a si ah cun (pumsa + thlarau) kan nunnak ah a sangbikmi teinak kan hmuh hrimhrim ko lai.

“Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih.” (Heb 4:12)