Pathian Bia hi Zeitin dah Kan Cohlaan Cio

Fur caan ah ruah ti ning cang tein a sur a si ah cun van in a hung tlami ruah ti hna hi sehzung in an chuah mi ti (Yi tanh) nak in a thiang deuh mi a si.

Kawlrawn khua te pakhat ah ruah a surtuk i pawngkam vialte ti nih a rak khuh dih. Ei din ding caah an herh mi ti mah le sining cio in i khawn a si caah, tarpa nih a chung le kha “bel a um mi paoh in ti khong hna u sih” tiah a fial hna. Ruah a haan tikah tarpa cu lengah a chuak i ti a donhter mi hna cu a va zoh. Thli hraan a fah pah caah bel pakhat cu aa rak i khup. A dang pakhat a zoh tthan i a pem mi bel a si caah ti a zuh dih kha a hmuh. A dang pakhat a hun zoh tthan tikah a kak mi bel a si caah ti cu duhsah tein an rak zut. A donghnak umm pakhat te lawng kha a ttha mi bel a si caah ti cu khat tein a um kha a hmuh.

Bupi nih nihin ni caah rel ding le ruah ding in a kan thim piakmi cathiang (Matt 13:1-13) hi Thlaici Vorhtu Bianabia kong a si. Van in a hung tla mi ruah ti cu a thiang mi a si bangin Pathian bia le cawnpiak nak hna cu a thianghlim mi an si. Cohlaan ning cang he pehtlai in tthat hnemhnak a kan pek cio.

Aa khup mi bel cu lam cungah a tla mi thlaici bantuk an si. Thangttha bia cu an theih ko nain an rak cohlaang duh lo. A pem mi bel cu lung cungah a tla mi thlaici bantuk an si. Thawngttha bia cu an theih ko nain zeiah an rello caah chikhat te ah an thlau dih colh. A kak mi bel cu hling lak ah a tla mi thlaici bantuk an si. Thawngttha bia cu an theih i an cohlaan ko nain an nunnak ah a langhter kho lo mi an si. Ttha tein aa tung i ti khat tein a um mi bel cu vawlei tthatnak ah a tla mi thlaici bantuk an si. Thawngttha bia kha an theih, an cohlaan i an nunnak ah a langhter kho mi an si. Zeitluk in dah lunglawmh awk a si.

Cuasicaah Jesuh nih: “Hna nan ngeih ahcun thei ko uh”(Matt 13:9) tiah a ti mi bia hi sullam a ngei tukmi bia a si. Kan nih pakhat cio hna zong aa khup mi bel bantuk maw, a pem mi maw, a kak mi maw, a ttha mi bel bantuk dah kan si cio hnga? Ruat cio hna u sih!