Pathian Bia le Lawmhnak

Zei ruangah dah kan pawngkam ah hin rawhralnak tuah dingin khua a khang tu hna hi an um lengmang hna hnga? Cun mi cheukhat hna nih hin zei ruangah dah mah zawn lawng ruah in an nun hnga? Khrihfa mi hna chung zongah mah zawn lawng aa ruat mi kan pawngkam ah an um zong kan hmuh bal ko hna lai. Pathian bia cu kan theih cio ko. Sihmanhsehlaw kan cohlaan ning hi aa lo cio hna lo. 

Minu pakhat nih Bawipa kha “Nangmah a rak in hring i a rak in cawmtu nu hi zeitluk in dik aa lawmh,” tiah a ti tikah Jesuh nih a leh mi cu, “Pathain bia kha a thei i a zulmi caah cun zeitluk in dik lunglawmhnak a si chinchin,” tiah a leh (Lk 11:27-28).

Mah zawn lawng ruahnak lungthin nih hin midang hna caah ngaihchiatnak tampi zong a chuahter khawh fawn. Mah zawn lawng ruah cu mah le mah lawng i dawt a si. Midang hna caah zeihmanh ruahpiak nak timi a um ti lo. Jesuh cawnpiak nak nun ning he zong aa pial kalh mi nun ning a si fawn. Jesuh nih: “Na innpa cu nangmah naa dawt bantukin na dawt lai” tiah a timi kha philh lo ding a si (Matt 22:39)

Mah zawn lawng aa ruatmi hna nih hin Pathian bia kha a theih cu an theih ko men lai, sihmanhsehlaw an nunnak ah Pathian bia kha aa nunpi lomi, a cohlang duh lomi an si timi kha fiang tein kan theih ding a si. 

Jesuh le Mary nun ning hi zoh hmanh hna u sih. Mah zawn aa ruat mi a si lo. Bupi chungin mithiang tiah cohlaanmi hna nunning zong zoh hmanh hna u sih. Mah zawn aa ruat lomi lawng te an si ko hna. Bawipa Pathian duhnak kha an duhnak nganbik ah a chia mi hna lawng te an si.

Dawtmi u le nau hna “Pathian bia kha a thei i aa zulmi” kan si lawngah biatak lunglawmhnak kan ngei kho hna lai. Cuasicaah Pathian bia kan thieh mi kha zulh ding le kan zumhmi Pathian bia hna kha tuahsernak in langhter ding a si (Jeim 2:14-17).