Pathian Bia ngaih hi a biapi mi a si ko

A caan caan ah cun hmai lei konglam siseh, hnulei kan dih cang mi konglam hna ruah tthan zong hi a ttha ngai mi a si. Biakhiahnak kan rak tuah mi hna zong tampi an rak um bantukin hmailei caan ca zongah biakhiahnak kan tuah hna. Nihin zeidah ka tuah lai, thaizing zeidah kan tuah hna lai tiin kan lung chungin biakhiahnak kan tuah tawn.

Nihin Bupi nih ruah tti dingin a kan thimpiakmi (Lk 10:38-42) chung kan zoh tik zongah Martha le Mary hna an sining, “a si ding mi le a ra lai ding mi caah timhtuahnak an ngeih nak sining” kan hmuh khawh.

Martha le Mary nih Jesuh cu an khual, an mi leng an hawikom bangin an rak cohlaan. Mah lio caan ah Martha le Mary hna nih an rak cohlaan ning aa dan nak te hi zoh tti ta hna u sih.

Martha

“Minu pakhat a min Martha a simi nih a inn ah a rak tlunter hna”(v. 38). Martha bangin Jesuh Khrih nih kan inn ah a kan tlung kho peng lai lo. A kan tlun lio caan te ah hin a ttha bik in don khawh ding hi kan i zuam cio tak ko hna lai. Martha bangin kan nih zong kan si kho ve. Khual tlung a dawmi, rian aa zuam mi zong kan si kho men. Jesuh nih a dawt ruangah a ttha bik in cohlaan a duh zong a si kho.

“Jesuh nih Martha le a naunu le Lazaruh kha a dawt hna” tiah Johan nih a ti(Jn 11:5). Cun Jesuh cungah a dawtnak le a zumhnak zong Johan nih (Jn 11:22-27) chungah fiang tein a langhter tthan rih.

A tu caan lio Khrihfa mi hna chung zongah Martha bantuk minung hna hi tampi an um a herh ve. Martha bangin mah lungthawh tein le theihhngalh nak in biaknak lei caah tiin aa zuammi, rian a ttuan thiammi, thil a ti kho mi hna hi tampi an um a herh. Sihmahsehlaw, “keimah lawng nih rian kan ttuan, midang hna cu zeihmah an ttuan lo, a theih zong an thei thiam lo” timi lungput belte cu ngeih lo ding a si. Martha zong nih, “Bawipa, ka nau nih keimah lawng rianttuan a ka rinh hi na zei a poi lo maw? Va bawm tiah hun chim” tiah a ti tikah Jesuh nih “Martha, Martha, thil tam tuk kong ah na lungre a thei i na ing a puang, sihmahsehlaw a herh taktakmi cu pakhat lawng a si ko” tiah a ti mi zong hi philh lo ding a si(vs. 40-42). “Keimah lawng an ka rih timi lungput ngeih lo ding a si”.

Mary

Mary sining te zong hi zoh tthan hna u sih. “Mary cu Bawpa ke hram ah cun a tthu i a cawnpiaknak kha a ngai”(Lk 10:39) tiah a ti. Mah hihi Jesuh nih, “Mary nih ahmaanmi thil cu aa thim cang i cucu ahohmanh nih an chut lai lo”(v. 42) tiah a ti mi kha a si. Hi zawn ah hin Jesuh Khrih zultu kan sinak le Jesuh cung kan zumhnak hrampi aa bunhnak sining dirhmuh zong kan hmuh khawh.

Kanmah le kanmah rianttuannak ah i buai ter leng mang i midang hna nih kan thangthat hna seh timi ruahchannak ngeihnak nak in, Jesuh Khrih cawnpiak mi “Bia” kha ttha tein ngaih ding hi a biapi deuh. James nih, “Pathian sinah khan i pe u law khamhnak an pe khotu hna bia, nan lungchung i a tuhmi kha i cohlan ko u”(James 1:21)tiah a ti. Cun mithiang Paul nih, “Cucaah zumhnak cu bia theihnak thawng khan a um i bia cu Khrih kong chimnak thawng khan a um” (Rom 10:17)tiah a ti ve. Johan nih, “Nannih cu kan chimhmi hna bia thawngin nan thiang cang. Keimah ah hin i peh u law kei zong nanmah he kaa peh ve lai. Mitsur nge nih amah te in thei a tlai khawh lo i a ruangah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo” (Jn 15:2-4) tiah a ti. Cun “Nannih nih cun nan ka thim lo, keimah nih kan thim hna i a hmun ding thei kha tampi in va tlai tuah u tiah kan fial hna”(Jn 15:16) tiah a kan ti rih. Cubantuk theipar kong he pehtlai in mithiang Paul nih a chimmi cu, “dawtnak, lawmhnak, daihnak, lungsaunak, zaangfahnak, tthatnak, zumhawktlakmi sinak, toidornak le mah le mah i tei khawhnak te hna hi an si” (Gal 5:22-23) tiah a ti.

Cuasicaah Bawipa nih Martha a chimhmi bia hna hi kan nih pakhat cio hna zong nih ttha tein kan theih thiam a herh ve. Zeicah tiah cun kan chungah rian a ttuan taktak tu cu Jesuh Khrih hrimhrim a si caah a si. “Ahodah a ngan deuh? Rawl ei awkah a tthumi kha maw ral a petu kha dah? Sihmanhsehlaw kei cu nan lakah rawl petu bantukin ka um”(Lk 22:27) tiah Jesuh nih a ti. “Cuticun pei Mi Fapa hi a si cu, rian ttuanpiak dingah ka rat ttung lo, mi tampi an rian ttuanpia awk le annih tlanhnak ca i ka nunnak pek awkah pei ka rat cu” tiah a ti hna(Matt 20:28).

Nang zeitin na ruah ve?