Pathian Bia Zulh!

Nan dihlak cungah Pathian nih Thluachuah in pe ko hna seh.

April 2, 2020 ni i kan theih kan rel hnga ding mi Cathiang hna cu;

Avoi (1) nak ah Gen 17: 3-9

Thawngtha bia relnak cu Jn 8: 51-59

Nihin kan rel mi Genesis chungah Abraham le Bawipa Pathian biakamnak an tuah nak kong kan rel. (Gen 17: 3-4) “Cun Abram cu a khuk aa bil i a bawh lioah Pathian nih cun, ‘Hi biakamnak hi kan pek: nangmah cu miphun tampi a hringsortu hna na si lai.’ Zeiruangah dah Abraham cu a khuk aa bil i a bawh? Kan khuk kan i bil i mi pakhat khat hmai ah kan bawh a si ah cun “nangmah cu teitu na si. kei cu nak sal ka si. nangmah cu a ka ngeitu na si” tiin kan hmai i a um mi sinah kan mah le kan mah kan i ap nak sullam a si. Bawipa Pathian nih Khaldi ram Ur khua in Abraham kha a auh, a chuahpi i ramthar, hmunthar a si mi Kanaan ram um dingah a rak auk tikah Abraham hi zeitluk in dah Khuaruahhar in a rak um hnga? Miphun dang hna sin i khual kan si tikah kan hmai cu a hngal kho cio hna lo. Cubantuk cun Abraham zong nih hin a rak ton ve ko lai. Bochan awk a rak ngeih mi cu a rak au tu Pathian pakhat lawng lawng hi a rak si. cun Bawipa nih: “Na Pathian ka si lai” a ti mi Bawipa nih a khuk aa bil i vawlei ah a bawk mi Abraham sinah Biakamnak a rak tuah. A fial tthan mi cu :

“Nangmah zong nih keimah he kan biakamnak hi na zulh hrimhrim ve lai, nangmah le hmailei chan i a um laimi na tefa hna nih nan zulh hrimhrim ve lai”(Gen 17:9) tiah Pathian nih Abraham sinah a ti fawn.

Gospel Thawngtha chungah Bawipa Jesuh nih a chim ve mi cu:

“Biatak kan chimh hna. Ka bia a zulmi cu zeitikhmanh ah an thi lai lo” (Jn 8: 51) tiah a ti ve.

Dawtmi u le nau hna, Pathian kan zumh kan ti. Kan khuk kan i bil ve hna i Pathian sinah thla kan cam ve hna.  A si ah cun “Pathian Bia kan zul taktak hna maw?” kan zulh taktak a si ah cun Pathian nih Abraham thluachuah a rak pek bang in kan nih zong a kan pek ve ko lai. Cun Lk 7: 38- ah a sualminu pakhat tiah a ti. “ Jesuh hnulei ah cun a kehram ah khan a dir, a tap i a mitthli in a ke kha a cinter. Cun a ke i a mitthli cu a sam khan an hnawh i a hnamh hna i zihmui kha a thoi hna” tiah a ti mi minu zong hi Pathian hmai ah a khuk aa bil i a sualnak caah ngeihchihnak-thatnak a tuah mi raungah Pathian nih a sualnak a ngeihthiam ti kan hmunh.

Thawhthan caan zong nikhat hnu nikhat in kan panh chin leng mang cang hna. Bawipa a thawhthan ni ah kan nih zong a thianghlim mi  lungthin he kan thawh khawh cio tthan nak hnga caah Ulh caan tiin Bipi nih a kan tuah piak.

Hi Ulh caan hna ah kan rel kan theih mi Bible cathiang hna chung kan zoh tthan a si ah cun Bawipa nih tuah ding tiah a kan fial mi lawngte a si zong kan hmuh khawh. A cheu nih Ulh caan cu Bupi nih tuah lo ding thil lawng a kan cawnpiak tiah kan ruah sual hna lai. A si lo, Bawipa nih tuahding, zulhding, ngeihding mi kong lawngte a kan cawnpiak.

Abraham nih Bawipa chimmi Bia a zumh i a zulh caah: “Bawipa nih Thluachuahnak tampi a pek.”

Cu a si caah Bawipa nih: “ka bia a  zulmi cu zeitikhmanh ah an thi lai lo” tiah a ti bangin Bawipa cawnpiak mi Bia a ngai kho tu, a zul kho tu le a nun pi kho tu si khawh i zuam zungzal hna u sih.

Download:Audio icon April 2 Ruahawk

Add new comment

5 + 1 =