Pathian Biakinn kan si

Khrihfa mi hna cu chungkhar tling tein Pathian sinah thla a cam timi an si bantukin pawngkam a ummi bu khat Khrihfa hawi dawt hna he biakinn thiang kal in le nuam tein aa pum timi an si. Khrihfa hna caah biakinn timi cu a thianghlim mi hmunhma a si caah sunhsak tuk mi le upatnak nganpi Pathian thangthat nak hmun zong a si.

Jesuh Khrih hnu zultu, hlaan lio Khrihfa mi hna cu hremnak le thahnak phun kip an rak ton caah a thli tein inn lian deuh le a kau deuh a ngei mi hna inn ah thlacam tinak, Pathian thangthat tinak le pakhat le pakhat thazang i pek nak an rak tuah ngei tawn. A.D 300 hnu Rome Siangpahrang nih “zalong tein Pathian nan biak khawh cang” tiah Khrihfa mi hna kha nawl a rak pek hna hnu lawngah biakinn ah thanuam tein pumh tti khawhnak caan ttha an rak ngei hna.

Nihin ni ah Catholic bupi nih “St. Johon Lateran” biakinn pi puai a kan tuah piak. Cun nihin ni caah Bupi nih ruah ti ding le thazang lak ti dingin a kan thiampiak mi cathiang cu (Jn 2:13-22) a si i Jesuh Khrih nih Jerusalem biakinn chungah chaw a dawr mi hna a tthawl hna nak kong a si, “Ka Pa inn cu chawdawrnak hmun ah ser hlah u” tiah a ti hna. Jesuh Khrih hrimhrim nih biakinn cu upatnak pek dingin a kan cawnpiak i a kan hmuhsak.

Mithiang Paul nih: “Pathian biakinn nan si kha nan hngalh i Pathian Thlarau nan chung i a um zong kha nan hngalh. Cucaah ahohmanh nih Pathia biakinn cu a hrawh ahcun, amah cu Pathian nih a hrawh ve lai. Zeicahtiah Pathian biakinn cu a thiangmi a si i nanmah hrimhrim cu biakinn cu nan si”(1 Cor 3:16-17). “Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta nan si lo, Pathian ta nan si; a man in cawkmi nan si. Cucaah nan pum cu Pathian sunparnak caah hmang u”(1 Cor 6:19-20) tiah a ti.

Catholic Khrihfa mi hna caah biakinn thiang cu tipil innak hmun, Bawipa Thisa kan cohlaan nak hmun, thitumhnak kan tuah nak hmun, sual thlahnak kan tuah nak hmun, tbk… le thih lohnak kan ton tik caan zongah hmanungbik kan i pumh tinak le kan i thlahnak hmun a si. Upat thiam hna u sih law sunhsak thiam hna u sih.

Kan pum cu “Pathian biakinn a si” tiah mithiang Paul nih a chim bangin kan pumsa zong thiang hlim tein sersiam ding le tuah ding a si. Pathian biakinn cu thlacam nak le thlauchuah halnak hmun a si bangin fel tein le thianghlim tein kan um nak thawngin midang hna caah thlauchuah a phurtu si hna u sih. Lunglawmhnak a chuahter kho tu si khawh i zuam hna u sih. Khamhnak bia, thluachauh bia a phuang tu si hna u sih.