Pathian Biakinn Thiang

Biaknak caah hman dingin tinhmi thil le hmunhma hna kha Pathian sin apnak “thianternak or pekchanhnak” (dedication or consecration) tuah timi cu biaknak phung (religion) kip nih tuah mi a si. Pathian caah “aa dang tein chiah” timi cu Pathian a sunparnak le a lianngannak kha langhter duh caah a si.

Nihin November 9 ni cu Bupi nih Lateran Basilica biakinn pi Pathian sin pekchanhnak, apnak, thianternak puai tiin a kan tuah piak mi ni caan zong a si. Hi puai pi nih a langhter duhmi le a kan theihter duhmi cu kan pum hi, “Pathian biakinn- Thiang Thlarau Pathian um nak Biakinn a si” (1 Cor 3:16) timi zong a si.

Hi puai pi nih a kan theihter rih mi cu “Pathian biakinn thiang a simi kan pumsa kha thianghlim tein chiah zungzal ding” timi a si. Jesuh nih a temhinnak, thihnak le thawhṭhannak thawngin Pathian biakinn thiang cu kan chungah hram a bunh cang, foundation a chiah cang. Mithiang Paul nih ralrin bia a chimmi cu: “Pathian biakinn kha zeitindah kan sak ti kha ahohmanh kan i ralrin awk cio a si,” tiah a ti. “Zeicahtiah Pathian nih Jesuh Khrih lawnglawng cu a hram caah khan a chiah cang i hram dang zeihmanh chiah awk ding a um ti lo” (1 Cor 3:10-11) tiah a ti. Hi Biakinn thiang sak ding hi Khrihfa kan si ah cun kan nun chungah kan tuah hrimhrim dingmi kan rian pi cu a si.

Prophet Ezekiel cathiang (Eze 47:1-2,8-9,12) chungah kan hmuh khawh mi cu “Biakinn innleng tangin tiput pakhat a chuah i nichuahlei ah a luan kha ka hmuh; biakinn cu nichuahlei a hoih. Ti cu orhlei kam thluahmah in a luang i biakṭheng thlanglei kamah cun a vung luang. Hi ti a luannak hmun paoh ah khan sermi thilnung zeipaoh nih nunnak an hmuh lai,”(Eze 47:1,9) tiah a ti. Biakinn in a chuakmi ti cu nichuahlei a luan bantukin kan nih hna zong kan tuahser nak vialte hna hi Pathian caah timi tinhnak he tuah ding a si ve. Ti cu orhleikam thluahmah in a luan bangin kan tuahsernak hna zong thildik-thil-hmaan an si ding a si. Cu tin kan nun a si ah cun kan um kal nak paoh ah nunnak ti kan luanter khawh ve ko lai. A nung mi Pathian thawngṭhabia kha kan tuahsernak in langhter a herh bangin midang hna caah nunnak petu kan si ding zong a si. 

“Pathian biakinn” a simi kan pum kan thurhnawmhter a si ah cun, midang mithmuh lawngah aparpavuan in ṭhatnak kan tuah a si ah cun sivai ṭhalo, thihsi “Ti” a luantertu kan si sual lai. Mithiang Paul nih: “Pathian biakinn nan si kha nan hngalh i Pathian Thlrau nan chung i a um zong kha nan hngalh. Cucaah ahohmanh nih Pathian biakinn cu a hrawh ahcun, amah cu Pathian nih a hrawh ve lai. Zeicahtiah Pathain biakinn cu a thiangmi a si i nanmah hrimhrim cu biakinn cu nan si,” ( 1 Cor 3:16-17) tiah a ti.

Pathian biakinn thiang chungin a chuak mi nunnak petu “Ti thiang” kan si a herh.