Pathian cu dawtnak a si (1John 4:8)

“Nan ral kha va daw hna u law an hremtu hna kha thla va campiak hna u”(Matthai 5:44) timi nawlbia hi chikhat ruahnak in a rak chuakmi ruah ning in kan ruah a si ahcun a si kho lomi nawlbia a si ti a fawi ngai mi a si. Sihmansehlaw Jesuh Khrih nih zeiruangah dah a kan cawnpiak hnga tiin zumhnak mit le ruahnak in kan ruah than a si ah cun a si kho mi a si caah a si kan ti than ko lai.

Minung aho kan si paoh ah aa dawh mi le duh a nung mi kan hmuh a si ah cun fawi tein dawt duh nak, dawt khawhnak lungthin kan ngei cio ko lai dah. Kan rem lomi hna, duh a nung lomi hna, aa dawh lomi hna kha cu fawi tein kan daw kho cio men hna lai lo.

Jesuh Khrih nih a kan cawnpiak mi dawtnak nawlbia kong hi fawi tein zulh khawh dingmi nawlbia cu a si hrimhrim lo. Kan dawt timi bia hi a chim a fawi tuk ko lai naa in zulh ding cu a har ngaingai mi a si. Sihmanhsehlaw, Khrihfa kan sinak ah a kan daw mi hna lawng kan dawt ve hna a si ahcun kan Khrihfa sinak, Jesuh hnu zul kan si; Jesuh cawnpiak nak a zultu ka si kan timi hi a parpavuan menmen a si ko lai. Jesuh nih, “Zeicahdah an dawtu hna lawng nan dawt hna tikah, Pathian nih laksawng an pek hna lai? Ngunkhuai khawltu hna hman nih cucu an tuah ko tung. Cun nan hawikom lawng kha nan cawnh hna ahcun, zeital a hlei in nan tuahmi a um maw? Pathain bia lo hmanh nih cucu an tuah ko tung” tiah a ti (Matthai 5:46-47).

Khrihfa pakhat ka si timi kan i theih a si ahcun Pathian nih a kan dawt hmasa nak kong kha ruat cio hna u sih. Johan nih “Kannih nih Pathian kan dawt cu Pathian nih a kan dawt hmasa caah a si” tiah a ti (1John 4:19). Pathian nih a kan dawt caah minung pakhat sining in a kan ser i a fale sining dirhmun ah a kan chiah. Pathian fanu fapa kan si ahcun Pathian bangin kan nun ding a si ko. Jesuh nih “Cuticun vancung khua i a ummi nan Pa fale cu nan si lai. Anih nih cun a thami he a tha lomi he, an cungah a ni kha a tlanter i, thatnak a tuahmi he that lonak a tuahmi he, an cungah a ruah kha a surter” tiah a ti (Matthai 5:45).

Minung cu kan that tuk ruangah le duh kan nun tuk ruangah Pathian nih a kan dawt siloin, Pathian cu dawtnak a si caah a si (1John 4:8). Pakhat le pakhat cungah dawtnak lungthin ngeih khawh i zuam cio hna u sih.