Pathian duhmi nunzia

Jesuh nih Pa Pathian sinah phanh khawhnak ding caah amah nun zia kha i zohchunh dingin a kan sawm. Vancung ram lei hoih in hi vawlei cung khual kan tlawn lio caan ah hin kan ruahnak vialte kha Jesuh Khrih cungah kan chiah dih a hau. Jesuh nun zia kha kan i zohchih a hau. Zeicah kan ti a si ah cun, Jesuh cu “Lam le biatak le nunnak” a si caah a si. Amah sin in dah ti lo cun Pa Pathian sin kan phan kho lai lo (Jn 14:6). Kan nunnak ah hin mansung thil ah kan i chiah mi hna hi an biapi tuk. Nang na nunnak ah teh mansung in naa chiah mi thil hna hi zeidah an si? Jesuh nih amah a zummi hna paoh cu amah nih thil a tuah bangin an tuah khawh ve lai tiah a ti (Jn 14:12). Jesuh nih zeidah a rak tuah, zeitindah a rak nun timi theih khawh ding caah amah he aa naih tein kan um a herh. Nifatin kan nunnak ah Jesuh he um tiin zeitindah um hna seh ti a kan duh timi kha theih i zuam ding a si. A kan duh piak mi thil kan tuah khawh nak hnga ding ca zongah amah sinah kan herh mi veel, thluachuah hal zungzal ding a si.