Pathian fial mi riantuan

Mivialte nih nunnak cu kan duh bik mi a si. Cu nunnak hmuh awkah mi tampi nih khamhnak lam kha kan kawl cio. Khrihfa hna nih biatak le lam le nunnak cu Khrih ah a um tiah kan zumh. Nunnak khamhnak kha hmuh awkah tiin Khrih kha kan kawl tikah a cawnpiaknak khan kan kawl. Mi tampi nih a cawnpiaknak cu Bible ah kan hmuh dih tiah an ti. Sihmanhsehlaw Bible hi a thuk ngaingai mi le a kau ngaingai mi a si caah a sullam hngalh a har ngaingai. a sullam theih lo in kalpi a si tikah thatlonak a phunphun a hung chuak.
Bible holh cun palhnak cawnpiaknak lam zulh sual a si. A sullam phuanmi aa khat lo ruangah Khrihfabu tampi i then a si i mi tampi lungchungah tuainak a chuah pi. Nihin kan theih kan rel mi cathiang chungah Peter le John hna cu tlang bawi ngan le hruaitu upa hna nih Jesuh Khrih min in biachim ti lo dingah an khamh ko hna nain, lamkaltu hna nih an leh hna mi cu: "Minung nakin Pathian nawl kan ngaih deuh awk a si" tiin an ti hna(Lam 5:39). Kan nih pakhat cio hna zong nih kan nunnak ah zeibantuk thil hna hi dah kan lam a kan phittu le dontu an si timi hi i thei hna u sih. Vawlei chawva maw? Uk tu hna maw? Hruaitu hna maw?.....