Pathian kha zum ko

Photo Credit

Jesuh nih a hnu zul in a thawngtha chimmi a ngaitu mibu pi kha a zoh hna i a zultu hna sinah, “Hi mi vialte hna pek awk rawl hi khuazei ah dah kan cawk lai,” (Jn 6:5) tiah a hal hna. Biatak ah cun zultu hna nih khuazei khua hmanh ah kal in va cawk a hau lo. An ei ding mi rawl cu an sinah a um ko kha theihter a duh hna caah a si. An sin i a um ko mi rawl kha kawl thiam ding le pakhat le pakhat i phawt, i cheuhbauh thiam dingah a duh piak hna caah a si.

Zultu Philip nih chikhat te ah a ruah mi a chimmi cu, “Tlawm cio ei ding hmanh ah denarii tangka 200 leng man changreu a herh lai,”(Jn 6:7) tiah a leh. Zeitin dah hi tin thil kan tonmi hi kan phisin lai timi ruah loin minung ruah ning, ngeihchiah thilri in phisin ding tu kha a rak ruah caah a si. Tangka a um lawngah hi thil hi kan phisin khawh lai timi ruahnak a si. Pathian, Jesuh bochan loin tangka tu kha aa rak bochan deuh.

A dang zultu pakhat a si mi Andrew nih cun, “Hika ah hin barli changreu hlum nga le nga pahnih a ngeimi ngakchiapa pakhat a um, asinain cu tham cu mi hi vialte caah cun zei cang dah a kal hnga,” (Jn 6:9) tiah Jesuh sinah a chimh. Andrew sinah eiawk a um lo nain eiawk a ngei mi kha a rak hmuh thiam khawh. A phi pakhat a hmuh ti zongin ti khawh a si. Sihmanhsehlaw Jesuh thil ti khawhnak cungah zumh nak a ngei dih kho tak ve rih lo mi a rak si. Nu le ngakchia hna tel loin mi 5000 ramcar chungah rawl pek ding cu a si kho lomi a si tiah kan nih hna zong nih kan ti ve tak cio ko lai.

Minung nih a si kho lai lo tiah kan rak ruah mi kha Pathian caah cun a si kho mi lawng te an rak si ko. Pathian cungah zumhnak a ngeimi hna caah cun a si kho dih. Pathian he a phi kan kawl a si ah cun kan duh mi a phi cu kan hmuh zungzal ko lai.

Kan ngeih mi thliri, chawva, fimthiamnak hna kha i hmuh thiam in Pathian sinah kan pek, kan ap a si ah cun Pathian nih a let tam chinchin in a karhter lai i a kan pek zungzal ko lai.

Add new comment

17 + 2 =