Pathian Mi Sinak

“Nan nih cu vawlei ta nan si ti lo” (Jn 15:19) tiah Jesuh nih a ti mi hi zei khi dah a chim duh chan mi a si hnga? Cathiang chungah “Vawlei” tiah a ti duh mi sullam cu “Pathian duhnak a doh tu le a ral tu” kha a chim duhnak cu a si. Jesuh Khrih hrimhrim zong hi vawlei cung a rak nun kal lio caan ah a hua tu a ral tampi an rak um; a donghnak ah cun a thah hmanh an rak thah. Kan nih hna zong nih Jesuh hnu kan zulh i a cawnpiak nak hna kha kan cohlaan a si ah cun Amah tluk silo hmanh ah tukforhnak le temhinnak cu kan ton ve hrimhrim ko lai. Zeicah kan ti a si ah cun Bawipa nih pei “Vawlei nih an huat hna ahcun, keimah a rak ka huat hmasa ti kha philh hlah u. Vawlei ta rak si u law cu, vawlei nih cun amah ta bantukin an dawt ko hna hnga”(Jn 15:18) tiah a kan ti cang cu. Bawipa lei kap maw kan si, siloah a do tu muihnak lei kap dah kan si hna? Thil dik lo mi le a palh mi, thlarau caah tihnung mi thil aa thim mi hna kong he pehtlai in prophet Isaiah nih:

“Nan lo cang! Thil tha cu thil thalo nan ti i thil thalo cu thil tha nan ti. Khua mui kha khua ceu nan ti i khua ceu kha khua mui nan ti. A kha mi kha a thlum nan ti i a thlummi kha a kha nan ti” (Isaiah 5:20)tiah a ti.

Bawipa cawnpiak mi thil hmaan hna kha kan cohlaan a si ah cun thil thalo nih zeitik hmanh ah a kan lem suai kho lai lo. Bawipa cawnpiak mi lam cohlaan khawhnak hnga ding caah cun “tangdornak lungthin” kan ngeih a hau. Pathian hawikom a si mi cu “vawlei” he an i ral zungzal ko lai. “Keimah kha an ka hrem ahcun nannih zong an in hrem ve ko hna lai, ka bia kha an ngaih ahcun nan bia zong kha an ngaih ve lai”(Jn 15:20) tiah Bawipa nih a ti. Zeicah kan ti a si ah cun : “nan nih cu ka hawile tiah kan ti hna”(Jn 15:15) ah Bawipa nih a kan ti cang ruangah a si.

Johan nih ralrin bia a kan chimh mi cu: “” Vawlei hi siseh, a chung thilri hi si hna seh, thlaihchan hna hlah u. vawlei hi nan thlaichan ahcun, Pathian dawtnak kha nan chungah a um lo”(1John 2:15). Bawipa Thiang Thlarau kan lung chungah hmunhma pe hna u sih law a dawtnak le a hmaan mi lam a si nak cungah dir zungzal hna u sih. Mithiang Paul nih: “Zeicahtiah a kan pekmi Thiang Thlarau thawngin kan lung chungah Pathian nih a dawtnak cu a toih in a kan thoih (Rom 5:5).”