Pathian rianttuan timi cu…(September 30, 2021)

“Cu hnuah cun Bawipa nih a dang 72 kha a thm hna i amah a kalnak ding khua le hmun paoh ah khan a hmaiah pahnih pahnih in a thlah hna. Annih cu a thalwh hna i, “Rawl ttuan awk a tampi ko nain a ttuantu tlawmte lawng an si. Cucaah rawl a ttuantu dingah mi tam deuh a thlah hna nakhnga lo ngeitu sinah khan thla va cam tuah u.” (Lk 10:1-2)

Bawipa nih mission rianttuan dingah rian a fial tik hna ah hin pakhat lawng siloin hawikom he a thlah hna. Pakhat le pakhat i bawmh khawh ding caah a si. “Atu ah i thawh u law kal u” tiah a ti rih. Thlarau khamhnak ding caah rianttuan timi ah hin zeitik hmanh ah a tuan tuk, a tlai tuk timi a um lo. A caan a um paoh ah ttuan ding a si. Minung cu taksa le thlarau in a nung mi kan si caah, ngakchia te zong an thi kho i upat hnu tar hnu zongah thih khawh a si. Thihnak timi hi kan theih lo caan ah a si kho mi a si caah thlarau rianttuan tu hna paoh nih hin i hlau tein khamhnak rianttuan khawh ding caah um zungzal ding a si.

“Nannih cu cenghngia lak i tuufa thlah bantukin kan thlah hna. Phaisa bawm siseh, zal siseh, kedah siseh i phorh hlah u; lampi ah ahohmanh biakchawnh awkah dircon hlah u”(Lk 10:4) tiah a ti fawn rih. Hihi kan zoh tikah thlarau rianttuan tu a si mi hna nih zeibantuk lungput dah ngeih ding a si timi hi fiang tein kan hmuh khawh. Rianttuannak ah dawnkhaan tu a um sual lai tiah Bawipa nih a theih cia caah a si. “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo” tiin Jesuh nih ralrinnak bia a kan chimh fawn(Matt 6:24). Phaisa kawl ding le chungkhar pawcawm nak caah tiin Pathian bia a phuang mi kan si sual ah cun ngeihchia kan si ko lai. Cun Jesuh nih fiang tein a chim bangin Amah ral kan si sual lai. Jesuh ral, Pathian ral si cu kan thlarau thihnak a si. “Cenghngia lak i tufa thlah bantukin kan thlah hna” tiah a timi zong hi kan zoh tikah ‘zeitluk in dah Pathian bia a phuang mi hna caah ttih a nun i tukforhtu zeitluk in dah a tam’ timi zong kan hmuh khawh. ‘Bawi pahnih sal nan si kho lai lo’ tiah Jesuh nih a chimmi hi thei zungzal hna u sih.

“Inn pakhatkhat ah nan luh tikah a hmasa bik ah, ‘Hi inn chungah daihnak um ko seh’ va ti u. Inn khat hnu inn khat in i thawn lengmang hlah u”(Lk 10: 5,7).

Pathian nih minung khamh nak ding caah minung kha rian fial tthan kan si. Thlarau tlau kawltu, Pathian rian a tuan tu hna nih lung tam lo ding, thleidannak lungthin ngeih lo ding timi zong kan hmuh khawh. Hi inn, hi khua phung kan chimnak ah cun phaisa a kan pek mi a tlawm tuk, rawl a kan dangh mi a tthaw lo, khat lei khua ah i tthial u sih, timi lungput ngeih lo dingin Bawipa nih a kan cawnpiak duh mi a si. Pathian rian kan ttuan nak ah hin ‘thlarau ti a haal mi hna mit in zoh i kan ttuan awk a si’. Phaisa mit in kan zoh sual a si ah cun a donghnak ah mualphaohnak le ngaihchiat nak lawng ton a si sual lai.

Dawtmi u le nau hna kan umnak hmunkip cio in kan si khawh ning cio in Pathian rianthiang ttuan khawh i zuam cio hna u sih. Canghngia lakah thlahmi tuufa bantukin ttih a nung ko lai; sihmanhsehlaw kan nun a donghnak ni ah kan hmuh te hnga ding mi laksawng cu kan caah lawmhnak in a khat mi laksawng a si te ko lai.