Pehtlaihnak

Nihin cu mithiang Thomas puai ni a si caah mithiang Thomas le Jesuh an i pehtlaih ning te hi ruah tti ka duh.

• Zultu dang nih khan, “Bawipa kha kan hmuh” tiah an ti (Jn 20:25)
• Thomas nih cun a thawh hna i, “A kut i thir hmaneh kha ka hmuh hna i cu thir hmaneh le a hnak kha ka kut in ka tawngh hna lo ahcun ka zum lai lo” tiah a ti hna(Jn 20:25).
• Cun Thomas cu a thawh i, “Hika ah hin ra law ka kut hi zoh tuah hna; cun ka hngak kha ka tawng tuah. Zum loin um ti hlah, zum cang ko” tiah a ti (Jn 20:27).
• Thomas nih cun, “Ka Bawipa le ka Pathian” tiah a ti (Jn 20:28).
• Jesuh nih cun, “Na ka hmuh caah n aka zumh. Sihmanhsehlaw keimah hmu loin a ka zummi hna caah cun lunglawmh awk a vas i dah” tiah a ti (Jn 20:29)

A cung lei Bible catlang hna hi kan zoh tikah Bawipa nih Thomas i zumhnak a der zia kha a hma hna le amah pumpak hrimhrim langhnak in a damter i a tthawnter tthan ti kha kan hmuh. “Ka hmuh lawngah ka zumh lai” tiah a chimtu Thomas nih Bawipa a hmuh tikah zultu dang hna nih Jesuh an hmuh ning bang siloin Pathian sining in a hmuh khawh.

Hma hna he a lang mi Bawipa cu minung taktak sining in zultu hna sinah a langh bangin, a hma hna nih a langhter tthan mi cu Jesuh temh innak tuar buin a thihnak kha a langhter. Cun zultu hna sinah a nungmi sining in a lang nak zong nih Jesuh Khrih cu Pathian taktak a si nak kha a langhter tthan rih. Hi vialte hna hi Thomas nih a hmuh i a theih caah “Ka Bawipa le ka Pathian” tiah ngamh sang ngai in a phuan ngamnak cu a si.

Cun ruah ding pakhat a um tthan mi cu mithiang Thomas hi zultu hna lak ah Jesuh Khrih kha Pathian tiah amah hmur hrimhrim in a phuang hmasa tu a si. Peter nih cun: “A Nungmi Pathian Fapa, Messiah kha na si”(Matt 16:16) tiah a chim ko nain “ka Pathian” tiah Thomas bangin Jesuh hmai zultu hna hmia ah a rak chim bal lo.Cun “Bawipa, khuazei i na kal lai kha kan hngalh ttung lo, zeitindah cuka phaknak lam cu kan hngalh khawh lai”(Jn 14:5) tiah Jesuh bia a hal tu Thomas cu zultu dang hna thawngttha bia phuannak hmun in a hlat bik nak India ram ah Khrih khamhnak thawngttha bia a phuang hmasabik tu a si ti zong in thangtthat a si.

Jesuh nih cun, “Na ka hmuh caah na ka zumh. Sihmanhsehlaw keimah hmu loin a ka zummi hna caah cun lunglawmh awk a va si dah” tiah a ti (Jn 20:29)bangin “A hma in damnak a kan pe tu Jesuh Khrih” hnu zumhfeh tein zul zungzal hna u sih.