Pek hnga dingmi cu pek ding a si ko

Jesuh chan lio ah hin Judah mi hna nih biaknak lei kong he pehtlai in siseh, uknak lei kong he pehtlai in siseh tax hi rak pek a si. Hi tax (thawhbur) kong he pehtlai in Maṭhai nih a cathiang chung hmun 2 ah a langhter. Pakhat nak cu (Matthai 17:24-27) a si i cu ka hmun ah cun biakinn ngunkhuai khawltu pawl nih Peter bia an hal nak a si: “Nan sayapa nih biakinn ngaunkhuai a pe bal maw?” tiah an hal. Jesuh nih thil sining kha ṭha tein a hngalh caah Peter cu a thawh i, “Simon, zeitindah na ruah? Aho nih dah vawlei cung siangpahrang hna hi ram dang thil luh man le ngaunkhuai an pek tawn hna? Cuka ram mi hna nih cun maw ramdangmi nih dah?” tiah a hal. Peter nih cun, “Ramdang mi nih ta,” tiah a leh.

Cun Jesuh nih, “A ṭha ko, cu ti a si ahcun ramchungmi nih cun pek a herh lo. Sihmanhsehlaw hi mi hna hi an thinhunter ka duh lo. Cucaah rili ah va kal law sio va thla, na sio hmasa bikmi nga kha a ka va keu law a ka chungah cun kan pahnih ca i a za ding tangka na hmuh lai; cun va kal law biakinn ngunkhuai cu va pe hna,” tiah a ti.

Ngunkhuai peknak kong he pehtlai in Maṭhai nih a langhter rih mi cu (Matthai 22:15-22) ah a si. Farasi mi hna le Herod minung hna nih Jesuh kha sual puh an duh caah bia an hal nak a si. “Saya, nang cu lih chim hmang lomi na si ti kha kan hngalh…….. Rom Siangpahrang ngunkhuai pek hi kan Phung he aa kalh maw kalh lo?” an ti. Jesuh nih an lungchungin thil ṭhalo an i timh kha a hngalh ziar hna i cucaah cun, “Mihrokhrol hna! Zeicahdah foih nan ka zalh? Ngunkhuai pek ding tangka cu ka hmuhsak tuah ngat u,” tiah a ti hna. Tangka cu an hun pek i, “Aho mui le aho min dah a cuang? tiah a hal hna. Annih nih “Siangpahrang mui le min,” tiah an leh. Cun Jesuh nih cun, “A si ahcun Siangpahrang cu siangpahrang ta a simi thil kha va pe u law Pathian cu Pathian ta a simi thil kha va pe ko u,” tiah a ti hna. 

Kan nih Khrihfa mi hna cu Vancung Pennak kong he pehtlai in a nung mi kan si. Sihmanhshelaw vawlei cung kan nun chungah hin cun thawh ding a simi cu thawh ding a si ko. Tax pek ding timi cu ram chungmi pakhat sinak in pek ding hrimhrim a si tiah biafehter nak a um caah pek ding a si ko. Hi tin kan pek mi tax hna nih hin mipi caah ṭhatnak a chuahpi nak hnga ding caah timi hmuitinhnak a um caah a si. Bianabia ah ram le miphun caah rian ṭuanmi hna caah a herhmi lahkhah peknak, zung rianṭuanmi hna caah lahkhah pek nak tibantuk hna ah hin hman a si tawn caah a si. Hitin tax pek mi nih hin mipi himnak ding caah rian a ṭuan tawn. 

Biaknak lei he pehtlai in kan zoh tik zongah Pathian sin pek hnga ding a simi cu pek ding a si. Pathian sin kan pek i a let zakhat in pek ṭhan nan si lai timi Pathian bia cung zongah zumhnak kan ngei cio. Biakinn ah tangka fang 1 ka pek lai i 1000 ka hmuh ṭhan lai tiin ruah-palh ding a si lo. Biakinn ah na pek mi chawva kha biakinn ca lawngah a si lo. Sifak harsa hna le a zaw a dam lomi hna caah siseh, bawmh a herhmi tampi hna caah rian a ṭuan timi zong kha theih ding a si. Pathian nih siang ngai in na pek nak cungah tangka le chawva in an pek ṭhan lo hmanh ah ngandamnak le lunglawmhnak, himnak timi thluachuah a let zakhat in an pek ko lai. 

Cuasicaah dawtmi u le nau hna pek hnga ding a simi tax (thawhbur) cu siang ngai in pekkhawh i zuam zungzal ko hna u sih.

Paul nih: “Mi vialte he i rem awk kha nan i zuam khawh chungin i zuam u,” (Rom 12:18) tiah a ti.

Jesuh Khrih nih: “Hi mi hna hi an thinhunter ka duh lo,” (Matt 17:27) tiah a ti.