Pekchanhnak

Nihin cu Bupi nih Bawipa Jesuh biakinn ah an chuahpi nak, a nu le a pa nih Pathian sin an pekchanhnak puai a kan tuah piak. Missa raithawinak chungah kan relmi Bible cathiang hna cu (Malakhi 3:1-4; Hebrew 2:14-18; Luke 2:22-40) an si. 

Mary le Joseph nih Jesuh kha biakinn ah an chuahpi i Profet Simeon sinin Pathian sinah an rak ap, an rak pekchanh bangin nihin ni zongah, abikin Pathian rianthiang a ṭuan lio mi hna caah thla kan campiak hna ding a si. Biaknak lei ah Pathian sin pumpek in rian a ṭuan i a kan hruaitu hna Pope, Cardinal, Bishop, Siangbawi hna le Sister hna caah abikin thlacam piak hna u sih. An nih hna zong minung an si ve bangin tukforhnak, harsat-ngaihchiatnak tampi a ingtuarmi an si ve hna. Pathian rianthiang an ṭuannak ah an nunnak a dih tiangin thianghlim tein an ṭuan khawh zungzal nak hnga ding le tukforhnak phunkip chungin teinak an hmuh khawhnak hnga ding caah thlacam piak hna u sih. 

Nihin kan relmi thawngṭhabia thiang kan zoh a si ahcun Jesuh a minung sinak in a voikhatnak bik biakinn a phanhnak, an phanhpi nak kong a si. Mikip nih kawl cio mi le duh cio mi, daihnak Siangpahrang a simi le khamhtu a simi Bawipa kha Biakinn chungah hmuh a si nak kong zong a si fawn. Profet Malakhi chungah, “Nan kawlmi Bawipa cu chikkhatte ah a biakinn ah a ra lai” tiah a ti (Malakhi 3:1). Cuasicaah Jesuh cu Biakinn thiang chungah hmuh khawh a si timi te zong kha theih ding a si. Jesuh a tlau lio caan zongah a nu le a pa nih an hmuh ṭhannak hmun zong kha Biakinn thiang ṭhiamṭhiam ah a si ko (Lk 2:46).

Ngakchia Jesuh cu a nu le a pa nih, phung nih tuah awk a si tiah a tining in, Biakinn chungah an run luhpi tikah, Simeon nih cun a rak pon i Pathian cu a thangṭhat i: “Nihin ah hin, maw Bawipa, nangmah nih na salpa cu dai tein ka rian na ka limter cang. Atu cu nangmah na biakamnak kha a tling cang. Zeicahtiah miphun vialte zohchih in khamhnak ding na rak timhmi cu ka mit hrimhrim in ka hmuh cang; Cucu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si,” tiah a ti (Lk 2: 27-32).

Pathian rianthiang ṭuan dingin Biakinn thiang chungah pekchanh a si ve mi kan tuukhal vialte hna zong nih mi vialte hna caah Pathian ceunak, ṭhawnnak le sunparnak an langhter khawh chinchin nak hnga ding caah kan si khawh ning cio in bawmh khawh i zuam hna u sih, thlacam piak cio hna u sih. 

Cun hi puai kan tuahnak nih a kan theihter rih mi cu kannih vialte hna zong Biakinn chungin Pathian sinah pekchanhmi kan si ve hna timi kha a si. Kan pum, kan thlarau cu tipil innak thawngin Pathian sinah pekchanh a si cang bangin thianghlim tein chiah khawh i zuam zungzal ding zong a si. Tukforhtu kut chungin kan luat khawh nak hnga ding caah siseh, teinak kan hmuh khawhnak hnga ding caah siseh Pathian sinah bawmhnak hal zungzal hna u sih. Siang ngai in kan i pekchanh a si ahcun Bawipa Pathian zong nih siang ngai in a kan bawmh zungzal ko lai.