Ralrin, Theih le Tuahser

Bible thiang cu kan nun lam a ceuter tu le kan i tinh mi hmun him tein kan phanh khawhnak hnga ding caah teinak thazang a kan pe tu a si. Kan rel tik zongah Thiang Thlarau Pathian sin in theih hngalh thiamnak ceunak hal ding le ttha te ruah buin rel ding kan si.

Nihin Bupi nih a kan thim piak mi Bible cathiang cu (Mark 12:28-34) hi a si. Phungbia cawnpiaktu saya pakhat nih Jesuh a hal mi bia le Jesuh nih a leh mi bia chungin ruah tti ka duh mi cu:
- “Nawlbia lakah hin zeidah a biapi bik? 28
- "Israel mi han ngai tua u; Bawipa kan Pathian lawnglawng hi Bawipa a si. Bawipa nan Pathian cu nan lungthin dihlakle nan nunnak dihlak le nan ruahnak dihlak le nan thazang dihlak in nan dawt lai; 30
- “cun a pahnihnak cu, Na innpa kha nangmah naa dawt bantukin na dawt lai,”31
- “Pathian Pennak in naa hlat lo” 34
timi cathiang catlang hna hi an si.

Dawtmi u le nau hna phunghram lei thiam mi pa Bawipa nih “Pathian Pennak in naa hlat lo” tiah a ti nak hi sullam a ngei mi a si. Pakhat le pakhat kan i chawnh biak tikah chim tawn mi biafang cu: “ngeih lo nak in theih lo hi a fak deuh” ti tawn a si. Theih thiam timi hi zeitluk in dah a biapit timi cu ho hmanh nih el khawh ding mi a si lo. Kan si a fah, chawva kan ngeih lo nak in theih thiam nak ngeih lo mi hi a fak deuh ngai mi a si. Sihmanhsehlaw, theih ko buin tuah lo zong hi ngeihchiat ngai ding a si fawn.

Pathian Pennak luh khawh dingah cun theih nak lawng hi a za rih lo. Tuah ding a um mi hna kha theihthiamnak he ralring tein kan tuah ding hi a herh rih fawn. Theihthiamnak, ralrinnak le tuah sernak timi phunthum hna hi an um tti peng ding a herh. Pathian nih a kan dawt kan theih, a kan zangfah i kan sualnak in a kan tlanh cang timi zong kan theih. Sihmahsehlaw, a nawlbia hna kha kan tuah ding le kan zulh ding hi Bawipa nih a kan duh piak. Kan zulh lo kan tuah lo a si ah cun kan Khrihfa sining in kan nun chan zong pak palawng a si ko.

Midang dawt ding a si timi hi kan theih, sihmanhsehlaw dawtnak lungthin he bawmh khawh ding tiang kha kan kal a hau. Cuasicaah, dawtnak kong theih sawh lawng hi a za rih lo. Tuah sernak in langhter ding timi hi kan nunnak ah i ralring tein kan theih ding a si. Ralring tein kan um lo a si ah cun pawngkam ah zeidah a cang i a herh tak mi an si ti zong theih manh lo in kan lanhtak sual lai. Motor mawh ah siseh, cycle mawh ah siseh, kan hmai lei kan zoh cio ko hna zongah a mawg cuahmah mi pa nih ralring tein a mawh lio i a hmuh mi hna kha hmuh manh lo in kan um kho. Ralring tein mawh lo ah cun accident zong ton khawh a si. Cuasicaah, ralrinnak timi hi a biapi tuk mi a si.

Nifa kan nunnak zongah thil ttha hi zei dah an si ti zong tampi cu kan theih cio ko hna. Sihmanhsehlaw, pumpak taksa duhnak lawng kan zulh tikah thil ttha a si mi hna zong kha tuah lo in mah duh mi lawng tuah tawn a si. Zeitlukin dah thil ttha kan tuah timi cu midang hal lo in mah tein i checkhlat zungzal ding a si.

Phunghram konglam tampi a thei tu phungbia cawnpiak tu saya pa kha Bawipa nih “Pathian Pennak in naa hlat lo” tiah a ti. Zei ruangah dah a si hnga kan ti a si ah cun, a herh mi thil phunthum chungah khan phun khat cu a rak ngeih cang ruangah a si. A dang pahnih hna zong tuah ding a herh rih ti duhnak a si. Pathian Pennak a phanh le phanh lo cu um rih seh, “naa hlat lo” timi hi a biapi mi a si. “Naa hlat lo” timi cu na phan cang lai tinak a si lo. “Tuahsernak” a ngeih kha a herh rih mi a si. A tuah tak le tuah tak lo cu mipa he aa san mi a si cang. A tuah taktak lo a si ah cun a phan lai lo ti zongin ti khawh a si.

Cu a si caah dawtmi u le nau hna, kan mah hna zong nih thil ttha a si tiah kan theih cang mi, Bawipa nih a kan cawnpiak mi nawlbia hna kha ralring tein kan zulh “tuah” a si ah cun Vancung Pennak cu kan co hrimhrim ko lai.