Ralring tein um u!

Bupi nih a hmanmi caan relnak kum a dihnak kan hun phan cang hna. Nihin Missa raithawinak ah kan relmi cathiang cu Luke 21:34-36 a si; Jesuh nih a hnu zultu hna kha ralring tein um dingin a cawnpiak hna nak kong a si. “I ralring tuah u. Zudin sa-einak le khuasak tintuk harnak lawng kha ruat hlah u, cu ti nan si ahcun cu Ni nih cun ruah lopi ah rap bantukin an foih sual hna lai,” tiah Jesuh nih a cawnpiaknak a ngaitu hna kha a ti hna. Cun “Zeicahtiah cu Ni cu vawlei cung i a ummi vialte hna cungah a tlung dingmi a si. Hi a tlung hnga dingmi thil vialte hi him tein chuak lakin nan tan khawh nakhnga, thazang nan ngeih nakhnga, ralring tein um u law thla va cam zungzal ko u,” tiah Jesuh nih a ti.

Vawlei cung kan nun caan hi caan tawite hmanh si ko hmanhsehlaw, ral (satan) tampi nih a kan ngiar lengmang caah i hlau tein kan um zungzal ding a herh timi kha Jesuh nih a chimmi a cu si. Mithiang Peter cakuat chung zongah hitin kan hmuh: “Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko” (1Peter 5:8).

Zeitik caan ah dah kan thih te lai, caan a dongh te lai, timi kong he pehtlai in a chim kho mi ahohmanh kan um lai lo. Hmanungbik kan caan cu Pathian Pakhat lawng nih a theih mi a si. Cu caan cu nihin zong a si kho mi a si bantukin thaizing zong ah a si kho mi thil a si. Jesuh nih fiang tein a chimmi cu “Sihmanhsehlaw cu ni le suimilam caan cu ahohmanh nih an hngal lo, vancung i a ummi vanmi zong nih an hngal lo, Fapa zong nih ka hnga lo, Pa lawnglawng nih a hngalh. Cu caan cu zeitik ah a si lai kha nan hngalh lo caah ralring te le fimhring tein um ko u. Zanlei ah a si kho, zanṭim ah a si kho, khuadei hlanah a si kho, nichuak ah a si kho. Duak tiah a rat sual ahcun i hngilh hluahmah in, in tanh hna hlah seh. Nan sin ka chimmi hi mi dihlak sin i ka chim a si; Hngilh loin hngak ko u,” (Mark 13:32-33, 35-37) tiah a ti hna. 

Caan dongh ni cu a phan hrimhrim ko lai. Sihmansehlaw ahohmanh nih kan theih lomi a si caah Bawipa nih a kan fial bangin thlacam buin “Ralring tein” le i hlau tein um khawh i zuam zungzal hna u sih.