Ralring tein Um U 

Jesuh nih a holh kho lomi khuachia kha a ṭhawl i cu khuachia cu a chuah tikah mipa cu holh hram aa thawk. Mizapi cu an khuaruah a har ko, sihmanhsehlaw a cheu nih an i thawh i, “Khuachia ṭhawl khawhnak ṭhawnnak a petu cu khuachia hna lak i an bawi bik Beelzebul kha a si,” an ti. A dang nih amah kha foih an rak duh ve, cucaah na tuahmi hi Pathian hnatla a si le si lo hngalhnak ah khuaruahharnak pakhat in ser tuah, an ti. Sihmanhsehlaw Jesuh an ruahnak kha a hngalh i, “Ram zeihmanh, anmah le anmah aa domi bu ah aa ṭhen ahcun sau a dir lai lo, anmah le anmah aa domi innchungkhar cu an i ṭhen,” tiah a ti hna(Lk 11:14-17).

Jesuh nih: “Beelzebul ṭhawnnak in khuachia kha ka ṭhawl hna a si ṭung lo, Pathian ṭhawnnak in pei a si deuh cu, cu nih cun Pathian Pennak kha nan sin a phan cang ti kha a langhter” tiah a ti. Jesuh nih Beelzebul a um lo tiah a ti lo. Cuasicaah Beelzebul hi kan pawng te ah a um kho mi a si. Ṭih a nung taktak mi sining le langh ning in si loin zeihmanh harsatnak pek a hmang lomi bantuk te zong in a um kho mi a si. Ngakchia hna caah nu le pa le upa hna theih loin thil ṭhalo tuah le midang thil-fir, hrawhnak lei ah a phanhtertu tukforh tu sining zong in a um kho mi a si. Upa deuh hna caah pakhat le pakhat cungah nahchuahnak lungput ngeih, cun rem lonak a chuahter tu biachimnak in siseh, ṭhat lonak kong ceih-phuannak in siseh a um kho mi a si. Hi bantuk “Beelzebul” tete hi kan pawngkam ah tamtuk hringhran an um caah kan i ralrin tuk ding hi a herh mi a si. 

Pakhat le pakhat karlak ah buaibainak a chuahter tu hna khi na hmuh bal ko hna lai. Asiloah kanmah hrimhrim maw kan si tawn, ruat hna u sih. Beelzebul nih a hmaanmi hriamnam kan si sual nak hnga lo kan i ralrin zungzal ding a si. Jesuh nih ṭhatnak a tuah cuahmah ko mi kha mipi nih an hmuh ko nain “Beelzebul” ṭhawnnak in a tuah mi a si tiah sual phawtu hna zong an um leh rih ko khah. Anmah an chung hrimhrim ah Beelzebul aa hruk timi kha an i thei tawn lo. Kanmah hna zong lungthin ṭhalo kan ngei sual hna maw? Kan ngeih sual a si ahcun tukforhtu Beelzebul sinin a ra mi a si ti kha theih ding a si. Beelzebul a teitu Pathian sinah pumsa, thlarau thazang ṭhawnnak le himnak hal zungzal hna u sih.

Pathian fale hna an rawhral nak hnga ding caah khua a khaang zungzal tu le lam a kawl zungal tu tukforhtu kan pawng te ah a um ve zungzal timi zong kha theih ding a si. Peter cakuat chungah: “Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko,” tiah a ti (1 Pet 5:8).