RAMCAR AUTHAWNG

Siangpahrang Tiberus kha a bawi kum hleinganak kum a si……..Annas le Kaiafas cu tlangbawi ngan an si. Cucaan lio ahcun Zakhariah fapa Johan sinah ramcar chung ah khan Pathian bia cu a phan…… “Nan nun tthin ulaw tipilnak ing u. Cun Pathian nih nan sualnak an ngaithiam hna lai,” a ti hna i Profet Isaiah nih a cauk chungah a rak ttial bang khan a hung si.
A ttialmi cu hitin a si:
“ Mizeimaw cu ramcar chungah khan a au i, Bawipa lam kha rak remh u, a kalnak ding lam kha ding tein rak ser u. A kuarnak hmun vialte kha rak chilh hna ulaw tlang sang le fingbo kip kha rak rawnhter hna u; lam aa ngermi kha rak dinter hna u, lam bingbo vialte kha rak tlorhnalh hna u,... theittha a tlai lomi kung poah cu hau an si lai i, mei chungah paih an si lai,” tiah a ti.

Mizapi nih cun an i thawh i, “A si kun ahcun zeidah kan tuah kun lai?” an ti. “Angki pahnih a ngeimi nih a ngei lomi kha pakhat tthen seh, cun rawl a ngeimi nih a ngei lomi kha hrawm seh,” a ti hna……

Cunglei Pathian bia hi advent chung i kan theih tawn mi a si , kan ruah tawn mi zong a si ve.

Uknak leiah Rom acozah kut tangah an rak si i, anmah Judah nawlbia tangah cun tlangbawi ngan pakhat lawng a rak um i, a nawl ngeihnak cu nunnak le thihnak tiang a si. Hi caan ahhin biaknak leiin thil umtu ning cu a rawk i, Rom cozah hna zong nih uknak leiah an tlamtling deuhnak hnga anmah duh in tlangbawi ngan an rak thimmi zong a rak um. Judah tlangbawi ngan Annas hmun ah khan Kaiafas kha an rak thimh.

Pilat, Herod, le Kaiafas hna hi a tthawngbik le nawl ngeimi hruaitu hna cu an rak si. Nifa tein hi hna pawl nih zeidah an chim an rel tihi mivial te nih ngaihpiak hna i an rak zulh.

Culio caan ah khan, Johan timi Pathian mi pa cu Judea khuate in a ra mi a si. Thetse ram ah Pathian bia cu a rak au pi. Cunglei in nawl ngeitu hna i, chimrelnak vialte he mipi hna cu an tthu an dir lio ah khan, ahohmanh nih theihlo mipa, Johan cu a rak chuak i, thawngttha a aupi. Mipi hna zong nih, ramcar authawng timi Johan sin tu ah an mertak thluahmah ko ti a si(Jn.3:7). Minung nunnak cu thilpuan le ei le din in petah a si tawn. Johan hi, lenglei zohdawhnak zeihmanh a um lo. Savun aih in saphaw taisawm te he a si ko. A ei le din zong khaubawk le khuai hliti hna an si. Sihmanhsehlaw, mipi hna cu ei le din thaw, thilpuan tthattha he Kaiafas, Herod, le Pilat hna lenglei zohdawh ngaimi hna kha an kaltak khawh hna i, Johan sin, ramcar ram ah an ni fuh khawhnak hi, nihin zumhtu hna ca ah ruahawk ngai thil a si. Zeicahtiah, nihin kan chanpi ah cun ramcar ramte cu, kaltak a si cang e…

Johan thawng`ha bia an ngaih dih hnu ah "… Zeidah kan tuah kun lai"? tiah an halmi zong hi ruahawk thil a si tthan. A sullam cu, zeizong vialte ca-ah timhcia (ready) an sining kha a langhter tthan. Nihin Khrih zumhnak cu, crusade phunphun, bibal conference a tu le tu, cawnpiaknak tampi chungah a ciahin ciah kan si cang. Pathian duhnak zulhawk hi tah ready kan si cang maw?

Johan nih a phi a pekmi hna hi: “ Anki zunhnih a ngeimi nih a ngeilo mi tthen hna seh. Rawl ei awk a ngeimi hna nih eiawk a ngeilo mi kha rawl hrawm hna seh” ti a si tthan. Christmas hi daihnak siangpahrang dawtnak siangpa hrang chuahpuai ti a si. Daihnak le lawmhnak taktak hi a pemi lawng nih an hmuh tawnmi chunglei in rumnak a si. Hi cathiang cu advent i, lungput taktak a si ve. Dainak le lawmhnak Siangpahrang kan cohlannak a ningcang kha Johan nih a kan forhnak a si.

Cucaah, zumhtu u le nau hna, advent caan ah Johan i “thetse ramcar authawng” hi a thar in ruattthan usih.

Catail tu. Bishop Lucius Hre Kung